រដ្ឋបាលក្រុងខេមរភូមិន្ទ សូមជូនដំណឹងដល់ លោក លោកស្រី ម្ចាស់សណ្ឋាគារ ផ្ទះសំណាក់ សហគ្រាស បណ្តាក្រុមហ៊ុន ភោជនីយដ្ឋាន អាហារដ្ឋាន និងប្រជាពលរដ្ឋទាំងអស់មេត្តាជ្រាបថា ក្នុងឱកាសចូលឆ្នាំថ្មី ឆ្នាំសកលគ្រិស្ត សករាជ ២០២៤ ដែលនឹងឈានចូលមកដល់នាពេលខាងមុខនេះ ភ្ញៀវទេសចរណ៍នឹងធ្វើដំណើរមកកម្សាន្តនៅតាម រមណីយដ្ឋាននានាក្នុងក្រុង ជាពិសេសដើម្បីចូលរួមចំណែកទាក់ទាញភ្ញៀវទេសចរណ៍មកកម្សាន្តក្នុងក្រុងខេមរភូមិន្ទអោយ កាន់តែច្រើន និងរក្សាបាននូវសណ្ដាប់ធ្នាប់ និងរបៀបរៀបរយសាធារណៈ រដ្ឋបាលក្រុងមានកិត្តិយសសូមជូនដំណឹងដល់ អស់លោក លោកស្រីទាំងអស់ដូចខាងក្រោម៖
១- គ្រប់សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ត្រូវបង្កើនបដិសណ្ឋារកិច្ច និងសេវាកម្មល្អជូនភ្ញៀវទេសចរណ៍ អោយបានកាន់តែប្រសើរ មានកម្រិតស្តង់ដារ និងអនាម័យខ្ពស់។
២- ហាមបង្កើនតម្លៃសេវាស្នាក់នៅ និងតម្លៃម្ហូបអាហារហួសកម្រិត ដែលភ្ញៀវទេសចរណ៍ទទួលយកមិនបាន និងត្រូវអនុវត្តវិធានការការពារផ្សេងៗរបស់ក្រសួងសុខាភិបាល ដើម្បីបង្ការជំងឺឆ្លងគ្រប់ប្រភេទ។
៣- ត្រូវយកចិត្តទុកដាក់ប្រុងប្រយ័ត្ន ក្នុងការបង្ការនូវគ្រោះអគ្គីភ័យ ដែលអាចកើតឡើងជាយថាហេតុ។
៤- ហាមនាំអាវុធ ឬប្រើប្រាស់អាវុធជាតិផ្ទុះ គ្រប់ប្រភេទក្នុងក្រុងខេមរភូមិន្ទ ។
៥- ហាមប្រើប្រាស់ និងជួញដូរគ្រឿងញៀន និងសារធាតុញៀនគ្រប់ប្រភេទ ។
៦- ហាមបើកបរពេលស្រវឹង ឬបើកបររថយន្ត-ម៉ូតូ ហួសល្បឿនកំណត់ដែលបង្កអោយមានគ្រោះថ្នាក់ដល់ ការធ្វើដំណើរ និងការឈប់ចតយានជំនិះគ្រប់ប្រភេទគ្មានរបៀប បណ្តាលអោយកកស្ទះចរាចរតាម ដងផ្លូវសាធារណៈ ព្រមទាំងធ្វើអោយខូចសណ្តាប់ធ្នាប់សង្គម ។
៧- ម្ចាស់សត្វពាហនៈទាំងអស់ ត្រូវគ្រប់គ្រងមើលថែប្រកបដោយភាពទទួលខុសត្រូវខ្ពស់ ហាមដាច់ខាត ការព្រលែងពាលវាលពាសកាល បណ្តាលអោយប៉ះពាល់ដល់សណ្តាប់ធ្នាប់ក្នុងក្រុង។
៨- គ្រប់កំលាំងសមត្ថកិច្ចរបស់ក្រុង សង្កាត់ ត្រូវបង្កើនកិច្ចការ ការពារធានាសន្តិសុខ សណ្តាប់ធ្នាប់ជូន ភ្ញៀវទេសចរណ៍ជាតិ អន្តរជាតិអោយបានល្អប្រសើរ១០០%។
សូមចូលរួមអនុវត្តទាំងអស់គ្នា សូមអរគុណ! 🙏🙏
#ប្រភពពីរដ្ឋបាលក្រុងខេមរភូមិន្ទ#
