ថ្ងៃទី ៣០ តុលា ដល់ថ្ងៃទី០១ ខែវិច្ឆិកា ឆ្នាំ២០២៣ ដោយមានការសហការ សម្របសម្រួលពីរដ្ឋបាលស្រុកគិរីសាគរ មន្ទីរទេសចរណ៍ខេត្តបានបើកវគ្គបណ្ដុះបណ្ដាលស្ដីពី បដិសណ្ឋារកិច្ច និងទេសចរណ៍ស្របតាមបទដ្ឋានទេសចរណ៍អាស៊ាន លើជំនាញ គេហកិច្ច និងការបញ្ជ្រាបយេនឌ័រ លើកកម្ពស់ស្ត្រីក្នុងវិស័យទេសចរណ៍ ក្រោមអធិបតីភាព លោក សាយ ង៉ែត អភិបាលរង នៃគណៈអភិបាលស្រុកគិរីសាគរ និងលោក សុខ ចាន់គ្រឹះស្នា ប្រធានមន្ទីរទេសចរណ៍ខេត្ត ដោយមានសិក្ខាកាមចូលរួម
សរុប ៣២ នាក់ ស្រី ១៣ នាក់ នៅផ្ទះសំណាក់តាំងកេ ស្ថិតក្នុងឃុំកោះស្ដេច ស្រុកគិរីសាគរ ខេត្តកោះកុង ។ គោលបំណងនៃវគ្គបណ្ដុះបណ្ដាល គឺដើម្បីជំរុញក្នុងការផ្តល់សេវាកម្មប្រកបដោយគុណភាព បំពេញនូវតម្រូវការ និងទាក់ទាញភ្ញៀវទេសចរឱ្យមកសម្រាក កម្សាន្តក្នុងស្រុកគិរីសាគរ ជាពិសេសតំបន់ប្រជុំកោះស្តេច ដែលជាគោលដៅទេសចរណ៍ដ៏មានសក្តានុពល ប្រកបដោយភាពទាក់ទាញ ។ ជាមួយនិងសក្ដានុពលដ៏សម្បូរបែបនេះ លោកប្រធានមន្ទីរបានសំណូមពរឱ្យម្ចាស់អាជីវកម្ម សេវាកម្មទេសចរណ៍ទាំងអស់ យកចិត្តទុកដាក់បន្ថែមទៅលើ អនាម័យ បរិស្ថាន ការទុកដាក់សម្រាម ការរៀបចំដាក់តារាងតម្លៃ គុណភាពផលិតផល និងសេវាកម្ម ត្រូវមានតម្លៃសមរម្យ ជាពិសេសជួយផ្សព្វផ្សាយពីសក្ដានុពលទេសចរណ៍ នៃតំបន់ប្រជុំកោះស្ដេច ឱ្យបានកាន់តែទូលំទូលាយបន្ថែមទៀត ។
