ស្រុកស្រែអំបិល៖ កាលពីថ្ងៃព្រហស្បតិ៍ ៣កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែមីនា ឆ្នាំ២០២០ នៅសាលស្រុកស្រែអំបិល បានរៀបចំកិច្ចប្រជុំស្ដីពីការផ្សព្វផ្សាយ អប់រំ អំពីការផ្អាកអាជីវកម្ម KTV ក្រោមអធិបតីភាព លោក លី ច័ន្ទរាសី អភិបាលរង នៃគណៈអភិបាលស្រុកស្រែអំបិល និងមានការចូលរួមពីលោកនាយករដ្ឋបាលស្រុក ប្រធានការិយាល័យរដ្ឋបាល និងហិរញ្ញវត្ថុ កងកម្លាំងប្រដាប់អាវុធទាំងបីប្រភេទ និងម្ចាស់អាជីវកម្ម KTV ក្នុងស្រុកស្រែអំបិល ដោយយោងទៅតាមសេចក្ដីណែនាំលេខ ០៨០/២០ ស.ជ.ណ ចុះថ្ងៃទី១៨ ខែមីនា ឆ្នាំ២០២០ របស់រដ្ឋបាលខេត្តកោះកុង។ ក្នុងកិច្ចប្រជុំនេះ លោកអភិបាលរងស្រុកក៏បានបញ្ជាក់ផងដែរថា ការផ្អាកជីវកម្ម KTV ក្លឹបកម្សាន្ដ ការបញ្ចាំងភាពយន្ដ សារមន្ទីរ ការជួបជុំបែបសាសនាគ្រប់ប្រភេទ និងផ្អាកការប្រគុំតន្ត្រីនេះ នឹងត្រូវផ្អាករហូតទាល់តែមានការណែនាំជាថ្មី។ ការផ្អាកអាជីវកម្មទាំងនេះ គឺដើម្បីទប់ស្កាត់ និងបង្ការការរាតត្បាតនៃជំងឺកូវីដ១៩ (covid-19) ហើយប្រសិនបើរដ្ឋបាលស្រុករកឃើញថា មានការលួចបើកអាជីវកម្មណាមួយក្នុងចំណោមអាជីវកម្មដែលបានហាមឃាត់ខាងលើនោះ រដ្ឋបាលស្រុកនឹងចាត់វិធានការទៅតាមផ្លូវច្បាប់ ឬរហូតអាចឈានដល់ការបិទអាជីវកម្មនោះតែម្ដង។

ប្រភព៖ ប៊ួ សុភា