ឯកឧត្តម កាយ សំរួម ប្រធានក្រុមប្រឹក្សាខេត្តកោះកុង និងលោកជំទាវ ព្រមទាំងលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង និងស្វាមី បានអញ្ជើញចូលរួម ក្នុងពិធីបុណ្យមាឃបូជា នៅខេត្តកោះកុង។
ក្នុងឱកាសនោះ ឯកឧត្តម កាយ សំរួម និងលោកជំទាវ ព្រមទាំងលោកជំទាវ មិថុនា ភូថង និងស្វាមី និងពុទ្ធបរិស័ទមកពីទីជិតឆ្ងាយវេរចង្ហាន់ ទេយ្យវត្ថុ និងរាប់បាត្រព្រះសង្ឃ ចំនួន ៨០ អង្គ ដេីម្បីឧទ្ទិសកុសលដល់វិញ្ញាណក្ខន្ធមហាបុព្វបុរសខ្មែរ យុទ្ធជន យុទ្ធនារីដ៏អង្គអាចក្លាហានហ៊ានបូជាជិវិត ក្នុងបុព្វហេតុជាតិមាតុភូមិ និងឧទ្ទិសកុសលដល់បុព្វការីជន ញាតិការទាំងប្រាំពីរសណ្តាន ដែលបានចែកឋានរំលាយក្ខន្ធទៅកាន់លោកខាងមុខ សូមដួងវិញញាណក្ខន្ធលោកទាំងនោះបានទៅកាន់ទៅបរមសុខកុំបីឃ្លៀងឃ្លាតឡេីយ។
សូមបញ្ជាក់ថា ការប្រារព្ធពិធីបុណ្យមាឃបូជាគឺដើម្បីប្រារព្ធនូវព្រឹត្តិការណ៏ធំ៣យ៉ាងគឺ៖ ១.ការធ្វើចតុរង្គសន្និបាតប្រកបដោយអង្គបួន ២.ថ្ងៃដែលព្រះអង្គទ្រង់សម្តែងឱវាទបាតិមោក្ខ ដើម្បីដឹកនាំសត្វលោកទាំងអស់ឲ្យរួចផុតទុក្ខ ៣.ថ្ងៃដែលព្រះអង្គទ្រង់ដាក់អាយុសង្ខារជាមួយមារ៕
