រដ្ឋបាលខេត្តកោះកុង

មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកោះកុង មានកិត្តិយសសូមជម្រាបជូនដំណឹង ដល់ម្ចាស់រោងចក្រ សហគ្រាស សិប្បកម្ម ដែលកំពុងតែដំណើរការផលិតកម្មរបស់ខ្លួននៅទូទាំងខេត្តកោះកុងឲ្យបានជ្រាបថា៖ បច្ចុប្បន្ននេះមន្ទីរបានពិនិត្យឃើញថាមានម្ចាស់សហគ្រាស/សិប្បកម្ម មួយចំនួនកំពុងធ្វើការផលិតនូវផលិតផល និងចរាចរនៅ លើទីផ្សារដោយពុំទាន់មានច្បាប់អនុញ្ញាតនៅឡើយ ហើយក៏មានសហគ្រាស/សិប្បកម្មមួយចំនួនជាប្រភេទផលិតផលម្ហូប អាហារដោយមិនទាន់បានត្រួតពិនិត្យគុណភាពផលិតផលបានត្រឹមត្រូវ ដែលជាផលិតផលមានហានិភ័យខ្ពស់ អាចបណ្ដាល ឲ្យប៉ះពាល់សុខភាពអ្នកប្រើប្រាស់ ឬអ្នកបរិភោគ។ ដូចនេះមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សូមអំពាវ នាវដល់ម្ចាស់សហគ្រាស/សិប្បកម្មទាំងអស់ ដែលមិនមានច្បាប់អនុញ្ញាត ត្រូវមកដាក់ពាក្យស្នើសុំច្បាប់បង្កើត និងវិញ្ញាបនបត្រអនុញ្ញាតដំណើរការសហគ្រាស /សិប្បកម្ម នៅតាមបណ្ដាទីតាំងដូចខាងក្រោម៖
១. នៅអង្គភាពច្រកចេញចូលតែមួយ នៃរដ្ឋបាលខេត្តកោះកុង ឬ
២. នៅការិយាល័យច្រកចេញចូលតែមួយ នៃរដ្ឋបាលក្រុង ស្រុក ឬ
៣. នៅការិយាល័យច្រកចេញចូលតែមួយ នៃមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត ពត៌មានបន្ថែមអាចទំនាក់ទំនងទូរស័ព្ទលេខ ០៨១ ៨៨៨ ០៣៤ / ០១១ ៣៦៩ ៧៩៩ (Telegram)។
ចំពោះម្ចាស់សហគ្រាស/សិប្បកម្មណា ដែលមិនអនុវត្តតាមសេចក្តីជូនដំណឹងខាងលើនេះ មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកោះកុង នឹងចាត់វិធានការចំពោះម្ចាស់រោងចក្រ សហគ្រាស សិប្បកម្ម ដែលកំពុងតែ ដំណើរការផលិតកម្មរបស់ខ្លួន ស្របតាមច្បាប់ស្តីពីវិសោធនកម្មច្បាប់ ស្ដីពីការគ្រប់គ្រងរោងចក្រ និងសិប្បកម្ម ដូចមានចែងក្នុង ជំពូកទី៦ ស្តីពីទោសប្បញ្ញត្តិ ជាកំហិត ដោយសហការជាមួយអាជ្ញាធរមានសមត្ថកិច្ច ដើម្បីពិន័យអន្តរការណ៍ជាប្រាក់ និងធ្វើកិច្ច សន្យាជាលាយលក្ខណ៍អក្សរទុកជាការព្រមាន។
មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកោះកុង សង្ឃឹម និងជឿជាក់ថា លោក-លោកស្រី ម្ចាស់សហគ្រាស/សិប្បកម្មទាំងអស់ នឹងយកចិត្តទុកដាក់សហការអនុវត្តតាមខ្លឹមសារនៃសេចក្តីជូនដំណឹងនេះ ឲ្យមានប្រសិទ្ធ ភាពប្រកបដោយស្មារតីទទួលខុសត្រូវខ្ពស់។