នៅព្រឹកថ្ងៃទី២៧ ខែសីហា ឆ្នាំ២០២១ វេលាម៉ោង៨:០០នាទី លោក សាង ស៊ីណេត អភិបាលរងស្រុក ជាប្រធានក្រុមស្រាវជ្រាវកូវីដ-១៩ តំណាង លោក ហាក់ ឡេង អភិបាល នៃគណៈអភិបាលស្រុក បានដឹកនាំក្រុមការងារស្រុក សហការជាមួយតំបន់ប្រតិបត្តិការសឹករងកោះកុង កងកំលាំងប្រដាប់អាវុធទាំងបីប្រភេទស្រុក អាជ្ញាធរភូមិឃុំ ប្រជាការពារភូមិអណ្ដូងទឹក ចុះត្រួតពិនិត្យ និងសម្របសម្រួល ដំណើរការ យុទ្ធនាការចាក់វ៉ាក់សាំងបង្ការជំងឺកូវីដ-១៩ ដល់ ប្រជាពលរដ្ឋដែលមានអាយុចាប់ពី ១៨ ឆ្នាំ ឡើង(សម្រាប់យុទ្ធនាការថ្ងៃទី១) នៅសាលាវិទ្យាល័យបូទុមសាគរ ស្ថិតនៅភូមិអណ្ដូងទឹក ឃុំអណ្ដូងទឹក ស្រុកបូទុមសាគរ ខេត្តកោះកុង។ ឆ្លៀតក្នុងឱកាសនោះដែរ លោក អភិបាលរង បាននាំយកទឹកសុទ្ធចំនួន ៤០ យួរ នឹងថវិកាចំនួន ១.០៦០.០០០៛(មួយលានប្រាំមួយម៉ឺនរៀល) ប្រគល់ជូនក្រុមគ្រូពេទ្យទាហាន តំបន់ប្រតិបត្តិការសឹករងកោះកុង បន្ទាប់ពីនេះ លោកអភិបាលរងស្រុកបានផ្ដាំផ្ញើដល់បង ប្អូន អ៊ំ ពូ មីង លោកតា លោកយាយ ដែលទទួលការចាក់វ៉ាក់សាំង រួចហើយ ត្រូវអនុវត្តឱ្យបានខ្ជាប់ខ្ជួន តបតាមការណែនាំរបស់ក្រុមគ្រូពេទ្យ ហើយសូមអរគុណប្រជាពលរដ្ឋសហការចូលរួមគ្នាដើម្បីគ្រួសារ ដើម្បីភូមិឃុំស្រុក ខេត្តរបស់យើងទងអស់គ្នា និងត្រូវអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាល
“រស់នៅធម្មតា តាមបែបគន្លងថ្មី” និង
" ៣កុំ ៣ការពារ ២ចូលរួម"៖
- ៣ការពារ ៖លាងដៃ ពាក់ម៉ាស់ រក្សាគម្លាត ។
- ៣កុំ ៖ កុំទៅកន្លែងមនុស្សច្រើន កុំនៅកន្លែងបិទជិត កុំប៉ះពាល់គ្នា”។
-២ចូលរួម៖ ចូលរួមស្កេនកូដទីតាំងទប់ស្កាត់កូវី១៩ ចូលរួមវាក់សាំងការពារកូវីដ១៩។
ប្រភព:រដ្ឋបាលស្រុកបូទុមសាគរ
===============
ថ្ងៃសុក្រ ៤ រោច ខែស្រាពណ៍ ឆ្នាំឆ្លូវ
ត្រីស័ក ពុទ្ធសករាជ ២៥៦៥
ត្រូវនឹងថ្ងៃទី២៧ ខែសីហា ឆ្នាំ២០២១
សីហា 27, 2021
