លោកស្រី អ៊ិន សុភី អភិបាលរងស្រុកកោះកុង ដឹកនាំក្រុមការងារថ្នាក់ស្រុកចុះជួបសំណេះសំណាលសួរសុខទុក្ខ ប្រជាពលរដ្ឋធ្វើចត្តាឡីស័កនៅតាមខ្នងផ្ទះ ក្នុងឃុំជ្រោយប្រស់ ស្រុកកោះកុង ខេត្តកោះកុង
ស្រុកកោះកុង ៖ នៅព្រឹកថ្ងៃអាទិត្យ ១ រោច ខែទុតិយាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៥ ខែកក្កដា ឆ្នាំ២០២១ លោកស្រី អ៊ិន សុភី អភិបាលរងស្រុកកោះកុង និងជាអនុប្រធានគណៈកម្មាធិការអនុសាខាកាកបាទក្រហមកម្ពុជាស្រុកកោះកុង បានដឹកនាំក្រុមការងារអនុសាខាកាកបាទក្រហមកម្ពុជាស្រុក សហការជាមួយអាជ្ញាធរឃុំជ្រោយប្រស់ អញ្ជើញចុះជួបសំណេះសំណាល សួរសុខទុក្ខ និងនាំយកនូវអំណោយសប្បុរសធម៌របស់អនុសាខាកាកបាទក្រហមកម្ពុជាស្រុក ប្រគល់ជូនប្រជាពលរដ្ឋដែលកំពុងធ្វើចត្តាឡីស័កនៅតាមខ្នងផ្ទះចំនួន ០៦ខ្នងផ្ទះ ស្មើនឹង ០៧គ្រួសារ នៅក្នុងភូមិថ្មី និងភូមិជ្រោយប្រស់ ឃុំជ្រោយប្រស់ ស្រុកកោះកុង ខេត្តកោះកុង។ អំណោយដែលគ្រួសារនីមួយៗទទួលបានរួមមាន អង្ករ២៥គីឡូក្រាម ទឹកត្រី ១ដប ទឹកស៊ីអ៊ីវ ១ដប ប្រេងឆា ១ដប ស្ករស ១គីឡូក្រាម មី ១កេស ប៊ីចេង ១កញ្ចប់ ទឹកសុទ្ធ ២យួរ និងត្រីខកំប៉ុង ១ឡូ។
ទន្ទឹមជាមួយគ្នានោះផងដែរ លោកស្រី អភិបាលរងស្រុកកោះកុង ក៏បានអញ្ជើញជួបសំណេះសំណាលជាមួយក្រុមការងារគ្រូពេទ្យដែលប្រចាំការព្យាបាលអ្នកជំងឺកូវីដ-១៩ នៅមណ្ឌលព្យាបាលវិទ្យាល័យ ហ៊ុន សែន ត្រពាំងរូង ស្ថិតនៅភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង នាំបានយកនូវទឹកសុទ្ធចំនួន ២០យួរ ប្រគល់ជូនក្រុមគ្រូពេទ្យផងដែរ។
រូបភាព ៖ អ៊ឹង បឺត
