លោក អ៊ុក ភ័ក្ត្រា អភិបាលរងខេត្ត និងលោក អៀត វណ្ណា ប្រធានមន្ទីរផែនការ បានចូលរួមកិច្ចប្រជុំតាមរយៈកម្មវិធី ZOOM ដើម្បីអនុវត្តសេចក្តីសម្រេចលេខ ០២៣ សហវ ចុះថ្ងៃទី១៣ ឧសភា ឆ្នាំ២០២១ ស្តីពីយន្តការ និងនីតិវិធីនៃការអនុវត្តកម្មវិធីជំនួយសង្គមជាសាច់ប្រាក់ក្រោយបិទខ្ទប់សម្រាប់ប្រជាពលរដ្ឋ និងគ្រួសារប្រជាពលរដ្ឋមានការលំបាកផ្នែកជីវភាព ប្រជាពលរដ្ឋ និងគ្រួសារប្រជាពលរដ្ឋដែលមានអ្នកឆ្លងជំងឺកូវីដ ១៩ និងមានការលំបាកផ្នែកជីវភាព និងគ្រួសារប្រជាពលរដ្ឋដែលមានអ្នកស្លាប់ដោយសារកូវីដ១៩ ក្នុងព្រឹត្តិការណ៍ ២០ កុម្ភៈ ២០២១។ កិច្ចប្រជុំនេះរៀបចំដោយក្រសួងផែនការ និងមានការចូលរួមពីស្ថាប័នពាក់ព័ន្ធ រដ្ឋបាលរាជធានី ខេត្ត និងប្រធានមន្ទីរផែនការរាជធានីខេត្ត ដែលតម្រូវឲ្យរដ្ឋបាលរាជធានី ខេត្ត ត្រូវអនុវត្តការងារនេះជាបន្ទាន់ និងត្រូវផ្តល់ទិន្នន័យពាក់ព័ន្ធនឹងកម្មវិធីជំនួយសាច់ប្រាក់ខាងលើត្រឹមថ្ងៃទី២៥ ខែឧសភា ឆ្នាំ២០២១៕