រដ្ឋបាលខេត្តកោះកុង

លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការណែនាំពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានដឹកនាំកិច្ចប្រជុំ ដើម្បីត្រៀមចុះអនុវត្តវិធានរដ្ឋបាលចំពោះប្រជាពលរដ្ឋ ដែលបានទន្ទ្រានកាន់កាប់ សាងសង់ផ្ទះលើដីរដ្ឋ ស្ថិតនៅជាប់របង អាកាសយានដ្ឋានក្រុងខេមរភូមិន្ទ (ព្រលានយន្តហោះ) ភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ ការចុះអនុវត្តវិធានរដ្ឋបាលនេះ ក្រុមការងារដែលមានការចូលរួមសហការ ពីស្ថាប័ន អង្គភាពពាក់ព័ន្ធទាំងអស់ នឹងចុះរុះរើផ្ទះ ខ្ទម ដែលសាងសង់លើដីរដ្ឋ ដោយខុសច្បាប់ និងដកហូតយក សម្ភារៈដែលរុះរើបានទាំងអស់មករក្សាទុក។
សមាសភាពចូលរួមកិច្ចប្រជុំនេះរួមមាន រដ្ឋបាលខេត្ត ព្រះរាជអាជ្ញារង រដ្ឋបាលក្រុងខេមរភូមិន្ទ សង្កាត់ស្មាច់មានជ័យ ស្នងការដ្ឋាននគរបាលខេត្តកោះកុង បញ្ជាការដ្ឋានក្រុងខេមរភូមិន្ទ និងអ្នកពាក់ព័ន្ធ។
ជាមួយគ្នានេះដែរ លោក សុខ សុទ្ធី អភិបាលរងខេត្តកោះកុង ក្នុងនាមរដ្ឋបាលខេត្ត បានបញ្ជាក់ យ៉ាងម៉ឺងម៉ាត់ថា រដ្ឋបាលក្រុងខេមរភូមិន្ទ ក៏ដូចជារដ្ឋបាលស្រុកទាំងអស់ នៃខេត្តកោះកុង ត្រូវតែពង្រឹងការអនុវត្តច្បាប់ ទប់ស្កាត់ តាមដាន ត្រួតពិនិត្យ និងចាត់វិធានការឱ្យបានម៉ឺងម៉ាត់បំផុត ចំពោះជនខិលខូច ដែលលួចទន្ទ្រានកាន់កាប់ដីរដ្ឋ និងសាងសង់សំណង់អនាធិបតេយ្យ លើដីរដ្ឋ។
រូបភាព៖ ធានី
ខ្លឹមសារ ៖ ទីចាត់ការអន្តរវិស័យសាលាខេត្តកោះកុង