រដ្ឋបាលខេត្តកោះកុង ចុះផ្សព្វផ្សាយអំពីគោលនយោបាយដោះស្រាយដីធ្លី និងដំណើរការអនុវត្តបន្ត ជូនប្រជាពលរដ្ឋចំនួន ១៣១គ្រួសារ ដែលទទួលរងការប៉ះពាល់ពីគម្រោងអភិវឌ្ឍន៍របស់ក្រុមហ៊ុន ស៊ីណូម៉ិចស៉ិន ស្ថិតក្នុងភូមិសាស្រ្តស្រុកបូទុមសាគរ ខេត្តកោះកុង
រដ្ឋបាលខេត្តកោះកុង ចុះផ្សព្វផ្សាយអំពីគោលនយោបាយដោះស្រាយដីធ្លី និងដំណើរការអនុវត្តបន្ត ជូនប្រជាពលរដ្ឋចំនួន ១៣១គ្រួសារ ដែលទទួលរងការប៉ះពាល់ពីគម្រោងអភិវឌ្ឍន៍របស់ក្រុមហ៊ុន ស៊ីណូម៉ិចស៉ិន ស្ថិតក្នុងភូមិសាស្រ្តស្រុកបូទុមសាគរ ខេត្តកោះកុង
ក្រុមការងារចម្រុះថ្នាក់ខេត្ត ដឹកនាំដោយ លោក សុខ សុទ្ធី អភិបាលរង នៃគណ:អភិបាលខេត្តកោះកុង តំណាងលោកជំទាវអភិបាលខេត្តកោះកុង បានចុះផ្សព្វផ្សាយអំពីគោលនយោបាយដោះស្រាយដីធ្លី និងដំណើរការអនុវត្តបន្ត ជូនប្រជាពលរដ្ឋចំនួន ១៣១គ្រួសារ ដែលបានទទួលរងការប៉ះពាល់ពីគម្រោងអភិវឌ្ឍន៍របស់ក្រុមហ៊ុន ស៊ីណូម៉ិចស៉ិន ខូអិលធីឌី លីមីតធីត កន្លងមក ស្ថិតក្នុងភូមិសាស្រ្តស្រុកបូទុមសាគរ ខេត្តកោះកុង។
លោកអភិបាលរងខេត្ត បានជម្រាបជូនថា រដ្ឋាភិបាលបានសម្រេចកាត់ឆ្វៀលដីចេញពីឧទ្យានជាតិបុទុមសាគរ (ដែលកន្លងមកបានផ្តល់ជាសម្បទានដីសេដ្ឋកិច្ចឲ្យក្រុមហ៊ុន ស៉ីណូម៉ិចស៉ីន) ដើម្បីធ្វើអនុបយោគជាដីឯកជនរបស់រដ្ឋ សម្រាប់ធ្វើប្រទានកម្មកម្មសិទ្ធិជូនប្រជាពលរដ្ឋចំនួន ១៣១គ្រួសារ ដែលបានទទួលរងការប៉ះពាល់ពីគម្រោងអភិវឌ្ឍន៍របស់ក្រុមហ៊ុន និងបានបំពេញសលាកបត្រព័ត៌មានរួចរាល់ ជាមួយក្រសួងរៀបចំដែនដី នគរូនីយកម្ម និងសំណង់ នាពេលកន្លងមក។ ការបែងចែង ត្រូវបានធ្វើឡើងជាពីរខ្សែផ្លូវ គឺខ្សែទី១ ស្របនឹងវិថីសាយភូថង នឹងរៀបចំប្លង់ឡូតិ៍ ដែលមានដីទំហំ ទទឹង ២០ម៉ែត្រ គុណនឹង បណ្តោយ ៧០ម៉ែត្រ ហើយខ្សែទី២ នឹងរៀបចំប្លង់ឡូតិ៍ ដែលមានដីទំហំ ទទឹង ២០ម៉ែត្រ គុណនឹង បណ្តោយ ១០០ម៉ែត្រ សម្រាប់ធ្វើការបែងចែកជូនប្រជាពលរដ្ឋ ចំពោះដីដែលនៅសេសសល់ពីការបែងចែក ត្រូវទុកជាដីសាធារណ:របស់រដ្ឋ សម្រាប់សាងសង់ជាសាលារៀន មណ្ឌលសុខភាព ប៉ុស្តិ៍នគរបាល វត្តអារាម និងទីសាធារណ:ដទៃទៀត ដែលនឹងបម្រើដល់ផលប្រយោជន៍សាធារណៈ។ ចំពោះក្រុមប្រជាពលរដ្ឋ ឬបុគ្គលផ្សេងទៀត ដែលកន្លងមកធ្លាប់បានអះអាងរងផលប៉ះពាល់ ឬអ្នកដែលទិញដីបន្តពីក្រុមជនទុច្ចរិតណាមួយនោះ គឺសូមជម្រាបថា រដ្ឋបាលខេត្ត ជាគោលការណ៍ មិនដោះស្រាយជូនឡើយ។
ក្នុងឱកាសនោះផងដែរ លោកអភិបាលរងខេត្ត បានជម្រាបជូនថា ជាការអនុវត្តបន្ត រដ្ឋបាលខេត្ត បានណែនាំឲ្យរដ្ឋបាលស្រុកបូទុមសាគរ សហការជាមួយ មន្ទីរអង្គភាពជំនាញ និងអាជ្ញាធរពាក់ព័ន្ធ ចុះបោះបង្គោលព្រំដីដែលនឹងត្រូវរៀបចំបែងចែកជូនបងប្អូនប្រជាពលរដ្ឋ ១៣១គ្រួសារ និងកំណត់ព្រំដីសាធារណ:របស់រដ្ឋ ដែលពីការបែងចែកឲ្យបានច្បាស់លាស់។
មុននឹងបញ្ចប់ លោកអភិបាលរងខេត្ត បានថ្លែងអំណរគុណដល់បងប្អូនប្រជាពលរដ្ឋ ដែលបានចូលរួមជាច្រើនកុះករ និងបានធ្វើការអំពាវនាវជាសាធាររណ: ស្នើឲ្យអ្នកពាក់ព័ន្ធ ដែលបានទន្ទ្រានដីរដ្ឋកន្លងមក ត្រូវបញ្ឈប់សកម្មភាពជាបន្ទាន់ បើមិនដូចនេះទេ រដ្ឋបាលខេត្ត នឹងរៀបចំកសាងសំណុំរឿងបញ្ជូនទៅតុលាការតាមនីតិវិធី៕
