រដ្ឋបាលខេត្តកោះកុង

សិក្ខាសាលាពិគ្រោះយោបល់ ស្តីពីគោលការណ៍ណែនាំនៃបច្ចុប្បន្នភាពស្តង់ដាទីក្រុងស្អាតនឹងការធ្វើតេស្តសាកល្បងប្រព័ន្ធចុះឈ្មោះអនឡាញ នៃចលនាប្រឡងប្រណាំងទីក្រុងស្អាតលើកទី៣

រាជធានីភ្នំពេញ៖ មន្ត្រីបង្គោលនៃក្រុមការងារវាយតម្លៃទីក្រុងស្អាតនៃខេត្តកោះកុង បានចូលរួមសិក្ខាសាលាពិគ្រោះយោបល់ ស្តីពីគោលការណ៍ណែនាំនៃបច្ចុប្បន្នភាពស្តង់ដាទីក្រុងស្អាតនឹងការធ្វើតេស្តសាកល្បងប្រព័ន្ធចុះឈ្មោះអនឡាញ នៃចលនាប្រឡងប្រណាំងទីក្រុងស្អាតលើកទី៣ ក្រោមអធិបតីភាព  ណេប សាមុត អគ្គនាយកគ្រប់គ្រងឧស្សាហកម្មទេសចរណ៍ និងជាអគ្គលេខាធិការនៃគណៈកម្មាធិការជាតិវាយតម្លៃទីក្រុងស្អាត នៅសណ្ឋាគារភ្នំពេញ រាជធានីភ្នំពេញ។

សិក្ខាសាលានេះមានគោលបំណងផ្សព្វផ្សាយការដាក់បញ្ចូលនូវសូចនាករលម្អិតចំនួន ៣ បន្ថែម ទៅក្នុងស្តង់ដាទីក្រុងស្អាត រួមមានដូចខាងក្រោម៖

១- ខ្សែក្រវ៉ាត់បៃតង ក្នុងសូចនាករគោលនៃតំបន់បៃតង នឹងខ្សែក្រវ៉ាត់បៃតង។

២- ការរៀបចំវិថីម្ហូបអាហារ និងការពង្រឹងគុណភាពតូបលក់ម្ហូបអាហារតាមផ្លូវនៅតាមក្រុងឬខណ្ឌ និងទីប្រជុំជននានា ក្នុងសូចនាករគោលនៃហេដ្ឋារចនាសម្ព័ន្ធនិងសម្បទាទេសចរណ៍។

៣- ស្លាកសញ្ញាពាណិជ្ជកម្ម និង ស្លាកយីហោអាជីវកម្ម នៅក្នុងទីក្រុង ក្នុងសូចនាករគោលនៃសុវត្ថិភាពសុខាភិបាល សន្តិសុខ សណ្តាប់ធ្នាប់ទីក្រុង និងការផ្ដល់សេវាសាធារណៈ។

សូមជម្រាបថា ស្តង់ដាទីក្រុងស្អាតមាន ៧ សូចនាករគោល ចំនួន ៤១ សូចនាករលម្អិត នឹងមាន ១១៣ លក្ខណវិនិច្ឆ័យ ស្មើនឹង ១២០ ពិន្ទុ។ បន្ថែមពីលើនេះ ការទទួលបានជ័យលាភីត្រូវទទួលបាន ស្លាកសញ្ញាផ្ការំដួល ចំនួន ៣ ទង (៩០ – ១២០ ពិន្ទុ) ចំនួន ២ ទង (៧២ – ៨៩ ពិន្ទុ) និង ចំនួន ១ ទង (៤៨ – ៧១ ពិន្ទុ) និងមានសុពលភាពរយៈពេល ៣ ឆ្នាំ៕