រដ្ឋបាលខេត្តកោះកុង

នៅថ្ងៃទី06 ខែមករា​ ឆ្នាំ2021 លោកវេជ្ជបណ្ឌិត លី សូវ៉ាន់​ ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល និងការងារ​ បានចុះពិនិត្យមណ្ឌលចត្តាឡីស័កនានា ក្នុងខេត្តកោះកុង​ និងពិនិត្យ​មើលការយកវត្ថុវិភាគរកវីរុសកូវីដ-19 ពីប្រជាជនខ្មែរមកពីប្រទេសថៃ របស់មន្ត្រីក្រុមឆ្លើយតបបន្ទាន់ នៃមន្ទីរសុខាភិបាលខេត្ត​ នៅមណ្ឌលចត្តាឡីស័កកម្រិត2។ បន្ទាប់ពីជួបពិភាក្សាស្វាគមន៍ជាមួយលោកវេជ្ជ.​ទៅ​ ម៉ឹង​ ប្រធានមន្ទីរសុខាភិបាលខេត្ត និងមន្ត្រីក្រុមឆ្លើយតបបន្ទាន់ខេត្តកោះកុងរួចមក បន្ទាប់មកលោកវេជ្ជ. លី​ សូវ៉ាន់​ បានដឹកនាំក្រុមការងារ ចុះពិនិត្យប៉ុស្តិ៍ចត្តាឡីស័កច្រកទ្វារព្រំដែនអន្តរជាតិចាំយាម និងបណ្ដាមណ្ឌលចត្តាឡីស័កកម្រិត2 ក្នុងខេត្តកោះកុង​ និង​ផ្ដល់​អនុសាសន៍ល្អ​ៗ​ ដើម្បីធ្វើសកម្មភាពបង្ការទប់ស្កាត់ការឆ្លងរាលើដាលនៃជំងឺកូវីដ19​ កាន់តែមានប្រសិទ្ធិភាព។ នៅព្រឹកថ្ងៃទី07 ខែមករា​ ឆ្នាំ2021​ លោក វេជ្ជ.​ លី​ សូវ៉ាន់ បានដឹកនាំក្រុមការងារដដែល ចុះពិនិត្យការយកវត្ថុវិភាគពីប្រជាជនខ្មែរដែលបានធ្វើដំណើរមកពីប្រទេសថៃ និងធ្វើចត្តាឡីស័កនៅមណ្ឌលចត្តាឡីស័កកម្រិត2។