សាខា កក្រក ខេត្តកោះកុង៖ នៅថ្ងៃសុក្រ ១១កើត ខែបុស្ស ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៥ ខែធ្នូ ឆ្នាំ២០២០ លោក ជា សូវី ប្រធានគណៈកម្មាធិការអនុសាខា កាកបាទក្រហមកម្ពុជា ស្រុកកោះកុង បានចាត់ឱ្យលោកស្រី អ៉ិន សុភី អនុប្រធានគណៈកម្មាធិការអនុសាខា ដឹកនាំក្រុមការងារ សហការជាមួយអាជ្ញាធរមូលដ្ឋាន ចុះជួបសំណេះសំណាល សួរសុខទុក្ខជាមួយគ្រួសារក្មេងប្រុសដែលបានជួបឧបទ្ទវហេតុ ឆាបឆេះម៉ាសុីនទូក និងឆាបឆេះដបសាំង បណ្តាលអោយរងរបួសរលាកផ្ទៃមុខ និងដងខ្លួនធ្ងន់ធ្ងរ កាលពីថ្ងៃទី ២២ ខែធ្នូ កន្លងទៅ នៅស្រុកកោះកុង ខេត្តកោះកុង។
នាឱកាសនោះលោក លោកស្រី អ៉ិន សុភី អនុប្រធានគណៈកម្មាធិការអនុសាខា និងក្រុមការងារបានពាំនាំនូវប្រសាសន៍ផ្ដាំផ្ញើសួរសុខទុក្ខពីលោក ជា សូវី ប្រធានគណៈកម្មាធិការអនុសាខា លោកជំទាវ មិថុនា ភូថង ប្រធានគណៈកម្មាធិការសាខា ឯកឧត្តម ប៊ុន លើត ប្រធានកិត្តិយសសាខា ពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ពិសេសជនពិការដែលកំពុងជួបការ លំបាក ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ក្រុមការងារក៏បានបន្តថា សូមម្តាយឪពុក កុំអស់សង្ឃឹម ត្រូវបន្តការថែទាំសុខភាពកូនប្រុសដោយអនុវត្តន៍ ហូបស្អាត ផឹកស្អាត រស់នៅស្អាត និងត្រូវអនុវត្តនអនាម័យលាងដៃអោយបានញឹកញាប់ វិធានការពារខ្លួនពីជំងឺកូវីដ១៩ តាមការណែនាំរបស់ក្រសួងសុខាភិបាល និងត្រូវប្រុងប្រយ័ត្នចំពោះជំងឺគ្រុនឈាម គ្រុនឈីក ជំងឺផ្តាសសាយធំ និងត្រូវចូលរួមគោរពច្បាប់ចរាចរណ៍ទាំងអស់គ្នា ។
សម្ភារដែលអនុសាខាបានផ្ដល់ជូន រួមមាន ៖
អង្ករ២៥គីឡូក្រាម ទឹកត្រី ២ដប ទឹកស៉ីអ៉ីវ ២ដប ប្រេងឆា ១ដប ស្ករស ១គីឡូក្រាម មី១កេស ប៊ីចេង ១កញ្ចប់ និងត្រីខកំប៉ុង១ឡូ ព្រមទាំងថវិកាឧបត្ថម្ភអនុសាខា ៣២០ ០០០ រៀលផងដែរ។
