លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញចូលរួមកិច្ចប្រជុំ នៅទីស្តីការក្រសួងកសិកម្ម រុក្ខាប្រមាញ់ និងនេសាទ

លោក សុខ សុទ្ធី អភិបាលរងខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញចូលរួមប្រជុំពិភាក្សាពាក់ព័ន្ធនឹងរបាយការណ៍សង្ខេប លទ្ធផលស្រាវជ្រាវរបស់គណប្រតិភូគណបក្សសញ្ជាតិកម្ពុជាស្តីពីភាពអសកម្មរបស់ស្ថាប័ន និងអាជ្ញាធរដែនដីក្នុងការដោះស្រាយបញ្ហាដីធ្លីរវាងប្រជាពលរដ្ឋ និងក្រុមហ៊ុនខាម៉ាហ្ក្រាអុិនវេសមេនគ្រុប ដែលមានទីតាំងស្ថិតនៅភូមិព្រះអង្គកែវ ឃុំដងពែង ស្រុកស្រែអំបិល ខេត្តកោះកុង។ កិច្ចប្រជុំនេះប្រព្រឹត្តទៅក្រោមអធិបតីភាព ឯកឧត្តម ហៃ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានសមាសភាពចូលរួមប្រជុំដូចជា អភិបាលរងខេត្តខេត្តកោះកុង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុង រដ្ឋបាលព្រៃឈើ និងអ្នកពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ។
តាមរយៈកិច្ចប្រជុំនេះ បានឯកភាពគ្នា ដោយឱ្យរដ្ឋបាលព្រៃឈើធ្វើរបាយការណ៍ពាក់ព័ន្ធនឹងទីតាំងដីមានទំនាស់នេះ ជូនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពិនិត្យ សម្រេច។

ជាមួយគ្នានេះដែរ ទាំងលោក សុខ សុទ្ធី ក្នុងនាមរដ្ឋបាលខេត្តកោះកុង និងតំណាងរដ្ឋបាលព្រៃឈើ បានលើកឡើងថា ពុំអាចទទួលយកបានឡើយ ចំពោះការលើរបស់ប្រតិភូគណបក្សសញ្ជាតិកម្ពុជាថា ស្ថាប័ន និងអាជ្ញាធរដែនដីអសកម្មក្នុងការដោះស្រាយបញ្ហាដីធ្លីរវាងប្រជាពលរដ្ឋ និងក្រុមហ៊ុនខាម៉ាហ្ក្រាអុិនវេសមេនគ្រុប ដែលមានទីតាំងស្ថិតនៅភូមិព្រះអង្គកែវ ឃុំដងពែង ស្រុកស្រែអំបិល ខេត្តកោះកុងនេះ ព្រោះកន្លងមក ទាំងរដ្ឋបាលខេត្ត និងរដ្ឋបាលព្រៃឈើតែងយកចិត្តទុកដាក់ ខិតខំធ្វើការសម្របសម្រួលដោះស្រាយនេះជានិច្ច។
រដ្ឋបាលខេត្តកោះកុង តែងយកចិត្តទុកដាក់ ខិតខំធ្វើការសម្របសម្រួលដោះស្រាយរាល់បញ្ហារបស់ប្រជាពលរដ្ឋជានិច្ច មិនថាតែបញ្ហាទំនាស់ដីធ្លីប៉ុណ្ណោះទេ គឺរាល់បញ្ហាដែលប្រជាពលរដ្ឋស្នើសុំកិច្ចអន្តរាគន៍ពីរដ្ឋបាលខេត្ត រដ្ឋបាលខេត្តតែងតែយកចិត្តទុកដាក់សម្របសម្រួលដោះស្រាយ និងផ្តល់ការប្រឹក្សាយោបល់ជានិច្ច៕