មន្ទីរកសិកម្ម រុក្ខាប្រមាញ់ និងនេសាទខេត្តកោះកុង៖ បើកវគ្គបណ្តុះបណ្តាលបច្ចេកទេសចិញ្ចិមត្រីឆ្ពង់ក្នុងស្រះ និងវិធានការការពារនិងព្យាបាលជម្ងឺត្រី ដល់សមាជិកបណ្តុំអាជីវកម្មចិញ្ចិមត្រី
ថ្ងៃសុក្រ ១២កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៧ ខែវិច្ឆិកា ឆ្នាំ២០២០
ក្រុមការងារអនុកម្មវិធីផ្សព្វផ្សាយបច្ចេកទេសកសិកម្មធ្មីដែលធន់ទៅនឹងការប្រែប្រួលអាកាសធាតុ (ASPIRE) ដឹកនាំដោយលោក សេង ប៊ុណ្ណា នាយរងខណ្ឌរដ្ឋបាលជលផលកោះកុង សហការជាមួយក្រុមការងារអនុកម្មវិធីASPIREប្រចាំស្រុកមណ្ឌុលសីមា និងភ្នាក់ងារផ្សព្វផ្សាយកសិកម្មឃុំ បានរៀបចំបើកវគ្គបណ្តុះបណ្តាលបច្ចេកទេសចិញ្ចិមត្រីឆ្ពង់ក្នុងស្រះ និងវិធានការការពារនិងព្យាបាលជម្ងឺត្រី ដល់សមាជិកបណ្តុំអាជីវកម្មចិញ្ចិមត្រី ស្ថិតនៅស្នាក់ការសហគមន៍ឃុំពាមក្រសោប ស្រុកមណ្ឌុលសីមា។ វគ្គបណ្តុះបណ្តាលនេះមានការចូលរួមពីក្រុមប្រឹក្សាឃុំ និងសមាជិកបណ្តុំដែលជាសិក្ខាកាមសរុបចំនួន ៣៧ នាក់ ស្រី ០៩ នាក់។
លោក សេង ប៊ុណ្ណា នាយរងខណ្ឌរដ្ឋបាលជលផលជាគ្រូឧទ្ទេសក្នុងវគ្គបណ្តុះបណ្តាល សហការជាមួយលោក នូ ង៉ុយ នាយផ្នែករដ្ឋបាលជលផលពាមក្រសោប បានលើកយកមកបង្ហាញជូនដល់សិក្ខាកាមនូវប្រធានបទចំនួន ០២ សំខាន់៖
១. បច្ចេកទេសចិញ្ចឹមត្រីឆ្ពុងក្នុងស្រះ´ ៖ – ការជ្រើសរើសទីតាំងចិញ្ចឹមក្នុងស្រះ – ការរៀបចំសាងសង់ស្រះ – ការបញ្ចូលទឹកក្នុងស្រះ – ការលែងកូនត្រីពូជ – វិធីសាស្រ្តថែទាំនិងផ្តល់ចំណី។
២. ការការពារ និងព្យាបាលជម្ងឺត្រី ៖ – ជម្ងឺដែលបង្ករឡើងដោយបាក់តេរី – វិធីទប់ស្កាត់ កាត់បន្ថយជម្ងឺ និងការងាប់របស់ត្រី – វិធីសាស្រ្តព្យាបាលជម្ងឺត្រី។
វគ្គបណ្តុះបណ្តាលបានប្រព្រឹត្តទៅក្រោមការយកចិត្តទុកដាក់ត្រងត្រាប់ស្តាប់នូវមេរៀនបទពិសោធដែលគ្រូឧទ្ទេសបានបង្ហាញ និងបានលើកជាសំណួរជាច្រើនដល់គ្រូឧទ្ទេស និងដល់ក្រុមការងារ ដើម្បីបានជាធាតុចូលបន្ថែមលើចំណេះដិងក្នុងការចិញ្ចិមត្រីឆ្ពុងដែលខ្លួនធ្លាប់បានធ្វើកន្លងមក។
ក្រោយពេលបញ្ចប់វគ្គបណ្តុះបណ្តាលសមាជិកបណ្តុំអាជីវកម្មទាំងអស់មានសេចក្តីសប្បាយរីករាយដែលបានទទួលនូវចំណេះដឹងបច្ចេកទេសបន្ថែមលើការចិញ្ចឹមត្រីឆ្ពុងក្នុងស្រះ ដែលមានលក្ខណៈធន់ទៅនឹងការប្រែប្រួលអាកាសធាតុ ហើយបានប្តេជ្ញាចិត្តខ្ពស់ក្នុងការយកបច្ចេកទេសទាំងនេះទៅប្រើប្រាស់ក្នុងការពង្រឹង និងពង្រីកផលិត កម្មរបស់ខ្លួន ដើម្បីផ្គត់ផ្គង់តាមតម្រូវការទីផ្សា។
ប្រភព ៖ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង
