សាខាកាកបាទក្រហមកម្ពុជាខេត្តកោះកុង ដឹកនាំដោយ លោកវេជ្ជបណ្ឌិត ទៅ ម៉ឹង លេខាគណៈកម្មាធិការសាខា បានដឹកនាំក្រុមប្រតិបត្តិសាខា សហការជាមួយក្រុមការងារ អនុសាខា កក្រក ស្រុកគិរីសាគរ រួមដំណើរជា មួយអជ្ញាធរ មូលដ្ឋាន បានអញ្ជើញចុះសួរសុខទុក្ខ និងផ្តល់ជូន អំណោយមនុស្សធម៌ ដល់​គ្រួសាររងគ្រោះដោយសារខ្យល់កន្ទ្រាក់កាលពី ថ្ងៃទី២ និងទី៣ ខែសីហា ឆ្នាំ២០២០ សរុបចំនួន ៣៥គ្រួសារ ស្មើនឹង៣៥ខ្នងផ្ទះ នៅឃុំព្រែកខ្សាច់ ស្រុកគិរីសាគរ ខេត្តកោះកុង ដែលបណ្តាលអោយខូចខាតហ្វីប្រូស៊ីម៉ង់ចំនួន ៣៤៥សន្លឹក និងស័ង្កសី ៤៧សន្លឹក ។

ក្នុងឱកាសនោះដែរ លោកវេជ្ជបណ្ឌិត ទៅ ម៉ឹង និងក្រុមកាងារបាន ពាំនាំនូវប្រសាសន៍ផ្តាំ ផ្ញើសួរសុខទុក្ខ និងសោកស្តាយពីសំណាក់លោកជំទាវ មិថុនា ភូថង ប្រធានគណៈកម្មាធិការសាខា ឯកឧត្តម ប៊ុន លើត ប្រធានកិត្តិយសសាខា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាលសម្តេច តែងតែគិតគូរអំពីសុខទុក្ខរបស់បង ប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ពណ៌សម្បុរ និន្នាការនយោបាយអ្វីឡើយ។
ជាមួយគ្នានេះ លោកវេជ្ជបណ្ឌិត បានអំពាវនាវដល់បងប្អូន ប្រជាពលរដ្ឋទាំងអស់ ពិសេសបងប្អូនប្រជានេសាទ ត្រូវមានការប្រុងប្រយ័ត្នខ្ពស់ ពីបាតុភូតខ្យល់ កន្ត្រាក់ ផ្គរ រន្ទះ រលក សមុទ្រធំៗខ្ពស់ៗ។ ទន្ទឹមនឹងនេះ បងប្អូនប្រជាពលរដ្ឋថែទាំសុខភាពឱ្យបានល្អ ជាពិសេសទៅលើកុមារតូចៗ ត្រូវស្លៀកខោអាវវែង និងគេងនៅក្នុងមុងជ្រលក់ថ្នាំដើម្បីការពារជំងឺគ្រុនឈាម ព្រមទាំងចេះសម្អាតអនាម័យជុំវិញខ្លួន ជាពិសេសត្រូវចេះការពារខ្លួន និង កាត់បន្ថយហានិភ័យពីការឆ្លង ពីជំងឺកូវីដ១៩ តាមការណែនាំរបស់ក្រសួងសុខាភិបាល និងត្រូវ និងចូលរួមគោរពច្បាប់ចរាចរណ៍ទាំងអស់គ្នា។

សម្ភារដែលសាខាផ្តល់ជូនក្នុង១គ្រួសារៗទទួលបាន ៖ អង្ករ២៥គក្រ មីម៉ាម៉ា១កេស ត្រីខ១ឡូ តង់១ ដោយឡែក ហ្វីប្រូស៊ីម៉ង់ ៣៤៥សន្លឹក និងស័ង្កសី ៤៧សន្លឹក សាខាឆ្លើយតបទៅតាមទំហំខូចខាតជាក់ស្តែង ស្មើនឹងថវិកា ២,៥៧១,០០០រៀល (ពីរ លាន ប្រាំរយចិតសិបមួយពាន់រៀលគត់ ) ដោយឡែក សប្បុរសជន ក៏បានបន្ថែមជាថ្នាំពេទ្យជូនពួកគាត់ក្នុងម្នាក់ៗទទួលបាន១កញ្ចប់ដូចៗគ្នាផងដែរ ។