រដ្ឋបាលខេត្តកោះកុង

លោក ឈេង សុវណ្ណដា អភិបាលរងខេត្ត បានដឹកនាំក្រុមការងារចំរុះ ដែលមានអាជ្ញាធរក្រុងខេមរភូមិន្ទ មន្ទីរជំនាញ និងអង្គភាពពាក់ព័ន្ធ ចុះពិនិត្យទីតាំងស្នើសូមដំឡើងផ្ទាំងប៉ាណូ ០១កន្លែង ស្ថិតនៅភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ ក្នុងនោះលោកបានឱ្យអ្នកពាក់ព័ន្ធចូលរួមមតិយោបល់លើកស្នើសូមដំឡើងផ្ទាំងប៉ាណូនេះ ហើយមន្ទីរជំនាញបានចូលរួមថា ការស្នើសូមច្បាប់ជាគំរូមួយល្អ ហើយស្របច្បាប់ តែសូមកុំបំពាក់ការផ្សព្វផ្សាយគ្រឿងស្រវឹង និងរូបភាពណាដែលមិនល្អក្នុងសង្គម។
ក្រោយពីបានស្តាប់នូវមតិយោបល់របស់អាជ្ញាធរ និងមន្ត្រីជំនាញ លោក អភិបាលរងខេត្ត បានឯកភាពតាមយោបល់របស់មន្ទីរ និងអាជ្ញាធរ ប៉ុន្តែលោកបានស្នើបន្ថែមទៀតថា ការឯកភាពរបស់អ្នកពាក់ព័ន្ធក៏ពិតមែន លោកសូមរៀបចំរបាយការណ៍ពីលទ្ធផល ដែលចុះពិនិត្យឆ្លងលោកជំទាវអភិបាលខេត្ត ចំពោះកិច្ចការនេះជាមុនសិន ដើម្បីអោយលោកពីនិត្យ និងសម្រេចចុងក្រោយ៕
ថ្ងៃព្រហស្បតិ៍ ១០កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែកញ្ញា ឆ្នាំ២០២៤ September 12, 2024