រដ្ឋបាលខេត្តកោះកុង

សេចក្តីណែនាំស្តីពីការអបអរសាទរការបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ឆ្នាំ២០២៤ គម្រោងព្រែកជីកហ្វូណនតេជោ គឺជាគំនិតផ្តួចផ្តើមប្រកបដោយចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ហើយបាននិងកំពុងអនុវត្តដោយរាជរដ្ឋាភិបាល នីតិកាលទី៧ នៃរដ្ឋសភា ដើម្បីបន្សល់ទុកជាកេរមរតកប្រវត្តិសាស្ត្រ សម្រាប់កូនចៅជំនាន់ក្រោយរាប់ពាន់ឆ្នាំតទៅមុខ។ គម្រោងព្រែកជីក ហ្វូណនតេជោ នឹងផ្ដល់ផលប្រយោជន៍ដ៏មហាសាលដល់សង្គម-សេដ្ឋកិច្ចកម្ពុជា តាមរយៈការតភ្ជាប់ប្រព័ន្ធ ដឹកជញ្ជូនត្រង់ទៅសមុទ្រ ប្រើពេលវេលាខ្លី និងថ្លៃដឹកជញ្ជូនទាប។ គម្រោងព្រែកជីកហ្វូណនតេជោ នឹងជួយឱ្យព្រះរាជាណាចក្រកម្ពុជា ពង្រឹងនូវ ឯករាជ្យភាព ខាងនយោបាយលើការដឹកជញ្ជូនតាមផ្លូវទឹក។ ដើម្បីចូលរួមជាមួយរាជរដ្ឋាភិបាល និងបងប្អូនប្រជាពលរដ្ឋខ្មែរនៅទូទាំងប្រទេស ដែលបានគាំទ្រ និងសាទរយ៉ាងក្លៀវក្លាបំផុតចំពោះគម្រោងព្រែកជីកហ្វូណនតេជោនិងដើម្បីចូលរួមអបអរសាទរក្នុង ព្រឹត្តិការណ៍ជាប្រវត្តិសាស្ត្រនៃការបើកការដ្ឋានសាងសង់ព្រែកជីកហ្វូណនតេជោ ដែលនឹងប្រព្រឹត្តទៅនាថ្ងៃទី៥ ខែសីហា ឆ្នាំ២០២៤ ខាងមុខនេះ រដ្ឋបាលបូទុមសាគរ នៃខេត្តកោះកុង សូមធ្វើការណែនាំដល់អង្គភាពនានាជុំវិញស្រុក និងរដ្ឋបាលឃុំទាំងបួន ក្នុងស្រុកបូទុមសាគរ ដូចខាងក្រោម៖១-អង្គភាពនានាជុំវិញស្រុក និងរដ្ឋបាលឃុំទាំងបួន ត្រូវធ្វើការណែនាំគ្រប់គ្រឹះស្ថានសាធារណៈ និងឯកជន ព្រមទាំងបងប្អូនប្រជាពលរដ្ឋស្រុកបូទុមសាគរ សូមរួមគ្នាធ្វើការវាយគង ជួង រគាំង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលខ្លួនមាន នាវេលាម៉ោង៩:០៩នាទីព្រឹក នាថ្ងៃទី៥ ខែសីហា ឆ្នាំ២០២៤នៅគ្រប់ទីកន្លែង សាធារណៈសំខាន់ៗ គ្រប់ទីវត្តអារាម មណ្ឌលវិបស្សនា អាស្រម សាលាបុណ្យ វិហារសាសនា ស្នាក់ការស៊ូរ៉ាវ សាលារៀនរដ្ឋ និងឯកជន និងទីប្រជុំសហគមន៍ ឱ្យបានកុះករ ក្លៀវក្លា និងអធិកអធម ជាទីមោទនៈ។២-អង្គភាពនានាជុំវិញស្រុក និងរដ្ឋបាលឃុំទាំងបួន ត្រូវធ្វើការណែនាំគ្រប់គ្រឹះស្ថានសាធារណៈ និងឯកជន ព្រមទាំងបងប្អូនប្រជាពលរដ្ឋខេត្តកោះកុង រៀបចំលើកទង់ជាតិ ទង់ជ្វាលា បដា ពាក្យ ស្លោក ដើម្បីចូលរួមអបអរសាទព្រឹត្តិការណ៍ជាប្រវត្តិសាស្ត្រនេះ។៣- រដ្ឋបាលស្រុកបូទុមសាគរនិងរៀបចំពិធី អបអរសាទរ ដោយរៀបចំឱ្យមានការប្រគំតន្ត្រី និងការអុជកាំជ្រួច នាវេលាម៉ោង១៩:០០នាទីយប់ នាថ្ងៃទី៥ ខែសីហា ឆ្នាំ២០២៤ ។៤-អង្គភាពនានាជុំវិញស្រុក និងរដ្ឋបាលឃុំទាំងបួន ត្រូវធ្វើការប្រមូលផ្ដុំមន្ត្រីរាជការក្រោមឱវាទ និងរៀបចំធ្វើការវាយគង ជួង រគំាង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលខ្លួនមាន នាវេលាម៉ោង ៩:០៩ នាទីព្រឹកនាថ្ងៃទី៥ ខែសីហា ឆ្នាំ២០២៤ នៅអង្គភាពរបស់ខ្លួន។៥-អង្គភាពនានាជុំវិញស្រុក និងរដ្ឋបាលឃុំទាំងបួន ចូលរួមផ្សព្វផ្សាយ ឱ្យបានទូលំទូលាយអំពី អត្ថប្រយោជន៍នៃគម្រោងព្រែកជីកហ្វូណនតេជោ និងទស្សនីយភាព នៃការអបអរសាទរនានាពាក់ព័ន្ធនឹងការបើកការដ្ឋានសាងសង់ព្រែកជីកហ្វូណនតេជោ ឱ្យបានគ្រប់ទីកន្លែងដែលបានរៀបចំ។ ទទួលបានសេចក្ដីណែនាំនេះ សូម អង្គភាពនានាជុំវិញស្រុក និងរដ្ឋបាលឃុំទាំងបួន ចូលរួមអនុវត្តឱ្យមានប្រសិទ្ធភាពខ្ពស់ និងបង្ហាញពីការគាំទ្រ និងសាទរយ៉ាងក្លៀវក្លាបំផុតពីប្រជាពលរដ្ឋទូទាំងស្រុកបូទុមសាគរ ចំពោះគម្រោង ព្រែកជីកហ្វូណនតេជោ ដែលជា «គម្រោងរបស់ខ្មែរ បម្រើផលប្រយោជន៍ខ្មែរ និងជាមរតកដ៏មហាសាលតជំនាន់” ក៏ដូចជាការបង្ហាញអំពីចលនាជាតិដ៏ខ្លាំងក្លា រួមសាមគ្គី និងមនសិការជាតិខ្មែរទាំងមូលដ៏រឹងមាំ ក្រោមម្លប់នៃសន្តិភាព។

ប្រភព:រដ្ឋបាលស្រុកបូទុមសាគរ

===================

ថ្ងៃសុក្រ ៦ រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៦ ខែកក្កដា ឆ្នាំ២០២៤