រដ្ឋបាលខេត្តកោះកុង

លោក​ជំទាវ​ មិថុនា​ ភូថង​ អភិបាល នៃគណៈអភិបាលខេត្តកោះកុង​ បានអញ្ជេីញជួបសំណេះសំណាល និងចែកប័ណ្ណសម្គាល់នាវា និងសៀវភៅត្រួតពិនិត្យលក្ខណៈបច្ចេកទេសនាវា ជូនប្រជាពលរដ្ឋ​ក្នុង​ស្រុក​មណ្ឌលសីមា​។

លោកជំទាវអភិបាលខេត្ត បានថ្លែងអំណរគុណ ចំពោះមន្ទីរសាធារណការ និងជញ្ជូនខេត្ត និងអាជ្ញាធរឃុំ ស្រុក ដែលបានរួម សហការគ្នាកំណត់ទីតាំងផ្តល់សេវាជូនបងប្អូនប្រជានេសាទនៅមូលដ្ឋាន ដែលជាការបង្កលក្ខណៈងាយស្រួល ជូនប្រជានេសាទ ដោយបានកាត់បន្ថយការលំបាករបស់ប្រជានេសាទ ទាំងពេលវេលា និងថវិកា។ ជាក់ស្តែងនៅក្នុងស្រុកមណ្ឌលសីមានេះ យើងបានកំណត់ទីតាំងសម្រាប់ផ្តល់សេវា ជូនប្រជា នេសាទចំនួន ០២កន្លែងគឺ នៅឃុំប៉ាក់ខ្លង និងនៅឃុំពាមក្រសោប។
ដូច្នេះ សូម លោកពូ អ្នកមីង បងប្អូនប្រជានេសាទទាំងអស់ ដែលពុំទាន់មានប័ណ្ណ សម្គាល់នាវា និងសៀវភៅត្រួតពិនិត្យលក្ខណៈបច្ចេកទេសនាវា សូមទំនាក់ទំនងមន្ត្រីដែលបានមកបម្រើសេវាតាមពេលវេលា ដែលបានកំណត់គឺ ក្នុងឃុំប៉ាក់ខ្លង ០៥ថ្ងៃ និងឃុំពាមក្រសោប ០៥ថ្ងៃ ដើម្បីទទួលបានប័ណ្ណសម្គាល់នាវា ឬទូកនេសារបស់ខ្លួន ដែលជាលិខិតគតិយុត្ត មួយសម្រាប់សម្គាល់នាវា ឬទូកនេសាទស្របច្បាប់។ ជាមួយគ្នានេះ នាងខ្ញុំសូមស្នើដល់ បងប្អូនប្រជានេសាទទាំងអស់នូវចំណុចមួយចំនួនដូចខាងក្រោម៖
-សូមប្រើប្រាស់ឧបករណ៍នេសាទឱ្យបានត្រឹមត្រូវតាមច្បាប់កំណត់ ចៀសវាងការ ប្រើប្រាស់ឧបករណ៍នេសាទដែលច្បាប់ហាមឃាត់ ដែលបំផ្លាញធនធានជលផល និងធនធានធម្មជាតិដទៃទៀត។
-សូមកុំទៅនេសាទនៅកន្លែងហាមឃាត់មួយចំនួនដូចជា តំបន់សហគមន៍ តំបន់ អភិរក្សធនធានធម្មជាតិ និងតំបន់ត្រីពង…ជាដើម។
-សូមចូលរួមអនុវត្តច្បាប់ទាំងអស់គ្នា និងសូមចូលរួមថែរក្សាអភិរក្សធនធានធម្មជាតិ ដើម្បីឱ្យធនធានធម្មជាតិរបស់យើងអាចប្រើប្រាស់បានដោយយូរអង្វែង ចីរភាព។ សូមបងប្អូនប្រជានេសាទប្រុងប្រយ័ត្នផងដែរចំពោះការចេញទៅនេសាទក្នុង រដូវវស្សានេះ ដែលជារដូវមានភ្លៀងធ្លាក់ច្រើន និងខ្យល់ព្យុះខ្លាំងដែលអាចបង្ក គ្រោះថ្នាក់ដល់បងប្អូន។
ថ្ងៃសៅរ៍ ៣ រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៥ ខែឧសភា ឆ្នាំ២០២៤ May 25, 2024