លោក ហាក់ ឡេង អភិបាល នៃគណៈអភិបាលស្រុកបូទុមសាគរ បានអញ្ជើញជាអធិបតី ក្នុងពិធីបើកការដ្ឋានសាងសង់ផ្លូវគ្រួសក្រហម ដែលមានប្រវែង ១,៧៤១ម៉ែត្រ ទទឹង ៦ម៉ែត្រ ជាគម្រោងមូលនិធិរបស់រដ្ឋបាលឃុំកណ្ដោល ឆ្នាំ២០២០ ដែលចំណាយថវិកាអស់ប្រហែល ៤៤,៩៨០,០០០ រៀល ស្ថិតនៅភូមិតាំកន់ ឃុំកណ្ដោល ស្រុកបូទុមសាគរ ខេត្តកោះកុង ក្នុងឱកាសនោះដែលលោកអភិបាលស្រុក បានផ្សព្វផ្សាយសេចក្ដីប្រកាសព័ត៌មាន របស់ក្រសួងរៀបចំដែនដី នគរូបនីយកម្ម និងសំណង់។ លោកក៏បានបញ្ជាក់ផងដែរថា សម្រាប់ផ្លូវលំមួយខ្សែនេះ មិនមែនជាកម្មសិទ្ធិរបស់បុគ្គលណាម្នាក់ឡើយ គឺបានមកពីការខិតខំប្រឹងប្រែងយកចិត្តទុកដាក់របស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាតេជោ ហ៊ុន សែន ជាប្រមុខដឹកនាំ។ ហើយប្រទេសកម្ពុជាសព្វថ្ងៃនេះកំពុងតែអភិវឌ្ឍន៌ ទៅលើគ្រប់វិស័យ មិនថាទីក្រុង ឬទីជនបទឡើយ។ ការអភិវឌ្ឍទាំងនេះក៏ដោយសារប្រទេសមានសុខសន្តិភាព ដូច្នេះសូមបងប្អូនចូលរួមថែរក្សាសន្តិភាពឲ្យបានគង់វង្ស។ បើគ្មានសន្តិភាពក៏គ្មានការអភិវឌ្ឍដែរ។
ជាចុងក្រោយលោកក៏បានសំណូមពរឲ្យបងប្អូនចូលរួមថែរក្សាផ្លូវមួយខ្សែនេះ ហើយចូលរួមថែរក្សាអនាម័យ ដោយឈរលើគោលការណ៍បី គឺហូបស្អាត ផឹកស្អាត និងរស់នៅស្អាត។ ចូលរួមគោរពច្បាប់ចរាចរណ៍ពាក់មួកសុវត្ថិភាព នៅពេលបើកបរ និងជៀសឱ្យឆ្ងាយពីគ្រឿងញៀន។
ប្រភព : រដ្ឋបាលស្រុកបូទុមសាគរ