មន្ទីរកសិកម្ម រុក្ខាប្រមាញ់ និងនេសាទខេត្តកោះកុង៖ ដោយមានការសម្របសម្រួលពីលោក ឃុន ភឿន ព្រះរាជអាជ្ញារង នៃអយ្យការអមសាលាដំបូងខេត្តកោះកុង បានចាប់ឃាត់រថយន្តចំនួន ០១ គ្រឿង ដឹកជញ្ជូនអនុផលព្រៃឈើ ដោយគ្មានលិខិតអនុញ្ញាត
ថ្ងៃចន្ទ ៩កើត ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី៣០ ខែមករា ឆ្នាំ២០២៣
លោកនាយរងខណ្ឌរដ្ឋបាលព្រៃឈើកោះកុង និងលោកនាយរងទទួលបន្ទុករួមផ្នែករដ្ឋបាលព្រៃឈើអណ្ដូងទឹក សហការជាមួយមន្ត្រីឧទ្យានុរក្ស នៃឧទ្យានជាតិបុទុមសាគរ កម្លាំងកងរាជអាវុធហត្ថ ដោយមានការសម្របសម្រួលពីលោក ឃុន ភឿន ព្រះរាជអាជ្ញារង នៃអយ្យការអមសាលាដំបូងខេត្តកោះកុង បានចាប់ឃាត់រថយន្តចំនួន ០១ គ្រឿង ម៉ាកសាំងយ៉ុង ប្រភេទទេសចរណ៍ពណ៌ទឹកប្រាក់ ពាក់ផ្លាកលេខ កោះកុង 2C – 6579 ដឹកជញ្ជូនអនុផលព្រៃឈើ ( ចំណិតវល្លិរមៀត ស្ងួត ទម្ងន់ ៤៥៥ គីឡូក្រាម ) ដោយគ្មានលិខិតអនុញ្ញាត។
ដែលមានឈ្មោះ ហ៊ាង ហាក់មុន្នី ភេទប្រុស អាយុ ៥៣ឆ្នាំ ជាម្ចាស់ទទួលខុសត្រូវ។ កើតហេតុនៅក្នុងភូមិសាស្ត្រភូមិទួលពោធិ៍ ឃុំតានូន ស្រុកបូទុមសាគរ ខេត្តកោះកុង។ ក្រោយពីបានស្ដាប់ចម្លើយរួចមក ដោយមានការសម្របសម្រួលពីលោកព្រះរាជអាជ្ញារង ក្រុមមន្ត្រីមានសមត្ថកិច្ច បានបន្តចុះធ្វើការឆែកឆេរលំនៅដ្ឋានរបស់ឈ្មោះ សុខ វី ភេទប្រុស អាយុ ៤២ឆ្នាំ និងឈ្មោះ ប៉ាក ញ៉ាន ភេទប្រុស អាយុ ៤៤ឆ្នាំ ស្ថិតនៅភូមិពាមកាយ ឃុំកោះស្ដេច ស្រុកគិរីសាគរ ខេត្តកោះកុង។
បានរកឃើញវត្ថុតាងបន្ថែមទៀតរួមមាន៖
១-ចំណិតវល្លិរមៀត (ស្ងួត )ទម្ងន់ ៥០ គីឡូក្រាម,
២-វល្លិរមៀត (ស្រស់ ) ចំនួន ១២ បាច់។
តាមការបញ្ជារបស់លោកព្រះរាជអាជ្ញារង ក្រុមការងារកំពុងចងក្រងសំណុំរឿងចោទប្រកាន់ជនទាំង ៣នាក់ខាងលើ បញ្ជូនទៅអយ្យការអមសាលាដំបូងខេត្តកោះកុង ។
ប្រភព ៖ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង
