កិច្ចប្រជុំឆ្លងផែនការសកម្មភាពជាតិ ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាតក្នុងដែនសមុទ្រ នៃព្រះរាជាណាចក្រកម្ពុជា ឆ្នាំ២០១៩-២០២៣
កិច្ចប្រជុំឆ្លងផែនការសកម្មភាពជាតិ ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាតក្នុងដែនសមុទ្រ នៃព្រះរាជាណាចក្រកម្ពុជា ឆ្នាំ២០១៩-២០២៣ ។
នារសៀលថ្ងៃទី២៨ ខែមករា ឆ្នាំ២០២០ នៅសាលប្រជុំ(ក)សាលាខេត្តកោះកុង លោក ទូ សាវុធ អភិបាលរង នៃគណៈអភិបាលខេត្តកោះកុង បានដឹកនាំកិច្ចប្រជុំឆ្លងផែនការសកម្មភាពជាតិ ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាតក្នុងដែនសមុទ្រ នៃព្រះរាជាណាចក្រកម្ពុជា ឆ្នាំ២០១៩-២០២៣ ដោយមានការចូលរួមពីតំណាងមន្ទីរកសិកម្ម រុក្ខាប្រមាញ់ និងនេសាទ តំណាងខណ្ឌរដ្ឋបាលជលផល មន្ទីរសាធារណការនិងដឹកជញ្ជូន តំណាងនគរបាលការពារព្រំដែនទឹក ទីចាត់ការជំនាញសាលាខេត្តកោះកុង និងអ្នកពាក់ព័ន្ធមួយចំនួន។
នៅក្នុងកិច្ចប្រជុំពិភាក្សានេះ លោក ទូ សាវុធ បានមានប្រសាសន៍ថា ដេីម្បីឆ្លើយតបទៅនឹងសំណូមពររបស់ថ្នាក់ជាតិបានទាន់ពេលវេលា អំពីការពិនិត្យលេីផែនការសកម្មភាពជាតិ ស្តីពីការបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត ក្នុងដែនសមុទ្រ នៃព្រះរាជាណាចក្រកម្ពុជា ឆ្នាំ២០១៩-២០២៣ ដែលមានក្នុងកិច្ចប្រជុំនេះ ស្នេីសុំសមាជិកអង្គប្រជុំទាំងអស់ ជាពិសេសមន្ត្រីមកពីមន្ទីរជំនាញ សូមពិនិត្យ និងពិភាក្សាអោយបានល្អិតល្អន់គ្រប់ជ្រុងជ្រោយ មុននឹងឆ្លេីយតបអំពីលទ្ធផលនៃការពិនិត្យពិភាក្សានេះទៅថ្នាក់ជាតិវិញ។
