លោកជំទាវ មិថុនា ភូថង ប្រធានគណៈកម្មាធិការសាខា បានចាត់អោយលោក ឈួន យ៉ាដា នាយកប្រតិបត្តិសាខា សហការជាមួយអាជ្ញាធរមូលដ្ឋាន អញ្ជើញចុះសួរសុខទុក្ខ និងនាំយកអំណោយ មនុស្សធម៌ផ្តល់ជូនស្ត្រីទើប នឹងសម្រាលបានកូន ឈ្មោះ ម៉ារី ញឹម អាយុ២៩ ឆ្នាំ ជាកម្មការនារីរោងចក្រ ប្តីជាកម្មករសំណង់ រស់នៅជួលផ្ទះ ក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បច្ចុប្បន្នកូនរបស់គាត់មានអាយុបីខែ ដែលកំពុងកើតជំងឺ បេះដូងចំហរ ។
នាឱកាសនោះលោកនាយកប្រតិបត្តិសាខា បានពាំនាំនូវប្រសាសន៍ផ្ដាំផ្ញើសួរសុខទុក្ខពីលោកជំទាវ មិថុនា ភូថង ប្រធានគណៈកម្មាធិការសាខា កក្រក ខេត្តកោះកុង ពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ពិសេសស្ត្រីដែលទើបនឹងសម្រាលកូនថ្មីៗ ជួបការលំបាកដូចពេលនេះ ដោយ មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។
ជាមួយគ្នានោះផងដែរលោកនាយកប្រតិបត្តិសាខា ក៏បានណែនាំអោយបងស្រីប្រញាប់យកកូនទៅព្យាបាលនៅមន្ទីរពេទ្យគន្ធបុប្ផារាជធានីភ្នំពេញផងដែរ។
អំណោយដែលសាខាផ្តល់ជូនរួមមាន ៖
អង្ករ២៥គក្រ មី១កេស ត្រីខ១ឡូ ទឹកដោះគោឆៅ២ឡូ ទឹកក្រូច១យួរ អាវយឺត២ ទឹកដោះគោខាប់២កំប៉ុង ធូបមូស២ប្រអប់ ខោទឹកនោម១០ខោ សាប៊ូកូនង៉ែត១ដប ម្សៅ១ដប ព្រមទាំងថវិកា ១៥០.០០០រៀល។
