រដ្ឋបាលខេត្តកោះកុង

ខេត្តហៃណាន ប្រទេសចិន៖ លោក អ៊ុក ភ័ក្ត្រា អភិបាលរង នៃគណៈអភិបាលខេត្តកោះកុង និងជាប្រធានលេខាធិការដ្ឋាន នៃគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាខេត្តកោះកុង (គ.អ.ឆ.ក.) បានដឹកនាំប្រតិភូខេត្តកោះកុង ចូលរួមវេទិកាផ្កាថ្ម អន្តរជាតិលើកទី២ ឆ្នាំ២០១៩ ក្រោមប្រធានបទ «ចាប់ផ្តើមពីការគិតទៅកាន់អនាគត ការពារផ្កាថ្មតាមរយៈបច្ចេកវិទ្យា» ដែលបាននិងកំពុងប្រព្រឹត្តទៅចាប់ពីថ្ងៃទី១៣-១៧ ខែធ្នូ ឆ្នាំ២០១៩ នៅទីក្រុងសានយ៉ា នៃខេត្តហៃណាន ប្រទេសចិន។

វេទិកានេះរៀបចំដោយវិទ្យាស្ថានសមុទ្រចិនខាងត្បូងខេត្តហៃណាន នៃមហាសមុទ្រត្រូពិច ក្នុងគោលបំណងប្រមូលផ្តុំអ្នកស្រាវជ្រាវផ្នែកផ្កាថ្ម ដើម្បីចែករំលែកបទពិសោធន៍ របកគំហើញ និងស្ថានភាពបច្ចុប្បន្នពាក់ព័ន្ធនឹងការគ្រប់គ្រង និងស្រាវជ្រាវអំពីផ្កាថ្ម។ ក្នុងនោះខេត្តកោះកុងក៏មានកំណត់សម្គាល់មួយចំនួនជាវិជ្ជមាន មិនត្រឹមតែផ្កាថ្មនោះទេ ជីវចម្រុះ និងធនធានធម្មជាតិដ៏សំបូរបែបកំពុងតែបង្ហាញខ្លួននៅលើឆាកអន្តរជាតិ និងទាក់ទាញស្ថាប័នប្រតិបត្តិការផ្នែកគ្រប់គ្រងធនធានធម្មជាតិ និងសមុទ្រ មកចូលរួមសិក្សាស្រាវជ្រាវនៅខេត្តយើងនាពេលខាងមុខនេះ។

សូមជម្រាបផងដែរថា វេទិកាផ្កាថ្មអន្តរជាតិឆ្នាំនេះ មានការចូលរួមពីប្រទេសកម្ពុជា ចិន តៃវ៉ាន់ អូស្ត្រាលី ជប៉ុន ឥណ្ឌូនេស៊ី ថៃ តាមរយៈស្ថាប័នរដ្ឋ វិទ្យាស្ថាន និងសកលវិទ្យាល័យនានាជុំវិញពិភពលោក។