លោកស្រី អ៊ិន សុភី អភិបាលរងស្រុកកោះកុង បានដឹកនាំក្រុមការងារអនុសាខាកាកបាទក្រហមកម្ពុជាស្រុក ចុះជួបសំណេះសំណាលសួរសុខទុក្ខអ្នកជំងឺកូវីដ-១៩ នៅមណ្ឌលព្យាបាលវិទ្យាល័យ ហ៊ុន សែន ត្រពាំងរូង
លោកស្រី អ៊ិន សុភី អភិបាលរងស្រុក និងជាអនុប្រធានគណៈកម្មាធិការអនុសាខាកាកបាទក្រហមកម្ពុជាស្រុកកោះកុង តំណាងលោក ជា សូវី អភិបាលស្រុក និងជាប្រធានគណៈកម្មាធិការអនុសាខាកាកបាទក្រហមកម្ពុជាស្រុកកោះកុង រួមជាមួយគណៈកិត្តិយសអនុសាខា សហការជាមួយអាជ្ញាធរឃុំជ្រោយប្រស់ ឃុំត្រពាំងរូង និងក្រុមគ្រូពេទ្យព្យាបាលអ្នកជំងឺកូវីដ-១៩ ចុះជួបសំណេះសំណាល សួរសុខទុក្ខអំពីស្ថានភាពនៃអ្នកជំងឺកូវីដ-១៩ ចំនួន ១២នាក់ដែលកំពុងសម្រាកព្យាបាលនៃមណ្ឌលព្យាបាលអ្នកជំងឺកូវីដ-១៩ វិទ្យាល័យ ហ៊ុន សែន ត្រពាំងរូង។
នាឱកាសនោះ លោកស្រី អ៊ិន សុភី បានពាំនាំនូវការផ្តាំផ្ញេីសាកសួរសុខទុក្ខពីលោក ជា សូវី អភិបាលស្រុក និងជាប្រធានគណៈកម្មាធិការអនុសាខា ជាពិសេសពីសំណាក់លោកជំទាវ មិថុនា ភូថង អភិបាល នៃគណៈអភិបាលខេត្ត និងជាប្រធានសាខាកាកបាទក្រហមកម្ពុជាខេត្តកោះកុង ដែល លោកជំទាវ តែងតែយកចិត្តទុកដាក់គិតគូរជាប់ជានិច្ចចំពោះសុខទុក្ខប្រជាពលរដ្ឋគ្រប់ក្រុមគ្រួសារ និងគ្រប់ទីកន្លែង ដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ។
ក្នុងឱកាសនោះផងដែរ លោកស្រី អភិបាលរងស្រុក ក៏បាននាំយកអំណោយសប្បុរសធម៌របស់អនុសាខាកាកបាទក្រហមកម្ពុជាស្រុកកោះកុងមួយចំនួនប្រគល់ជូនអ្នកជំងឺទាំង ១២នាក់ និងក្រុមគ្រូពេទ្យព្យាបាលអ្នកជំងឺកូវីដ-១៩ ដែលប្រចាំការនៅមណ្ឌលព្យាបាលផងដែរ។
ស្រុកកោះកុង ៖ ថ្ងៃអាទិត្យ ៩ កើត ខែទុតិយាសាឍ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១៨ ខែកក្កដា ឆ្នាំ២០២១
