រដ្ឋបាលខេត្តកោះកុង

លោក សុខ សុទ្ធី អភិបាលរងខេត្តកោះកុង អញ្ជើញចុះពិនិត្យទីតាំងដី ដែលរដ្ឋបាលខេត្ត ឱ្យលោកស្រី លាង ហ៊ីម កាយអាចម៍ដីចាក់រំលោភចូលដីរដ្ឋចេញវិញ

លោក សុខ សុទ្ធី អភិបាលរងខេត្តកោះកុង ដោយមានការណែនាំពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានចុះពិនិត្យទីតាំងដីស្ថិតនៅភូមិទួលគគីរក្រោម ឃុំទួលគគីរ ស្រុកមណ្ឌលសីមា ខេត្តកោះកុង ដែលរដ្ឋបាលខេត្តឱ្យលោកស្រី លាង ហ៊ីម (ហៅ ម៉ា ហ្គោល)កាយអាចម៍ដីដែលចាក់រំលោភចូលដីរដ្ឋធ្វើឱ្យខូចខាតព្រៃកោងកាងចេញវិញ។ ការចុះពិនិត្យទីតាំងនេះ មានការចូលរួមពីលោកអភិបាលស្រុកមណ្ឌលសីមា លោកស្រីមេឃុំទួលគគីរ និងលោកមេភូមិទួលគគីរក្រោម។ តាមការពិនិត្យជាក់ស្តែងឃើញថា ទីតាំងដីដែលរដ្ឋបាលខេត្តតម្រូវឱ្យកាយចេញវិញនោះ ត្រូវបានលោកស្រី លាង ហ៊ីម កាយចេញវិញហើយ នៅសល់តិចតួចដែលកាយមិនទាន់អស់ ដូចស្ថានភាពដើម។
ក្នុងការចុះពិនិត្យទីតាំងដីជាក់ស្តែងនេះ លោក សុខ សុទ្ធី អភិបាលរងខេត្ត បានធ្វើការណែនាំដល់លោកអភិបាលស្រុក លោកស្រីមេឃុំ និងមេភូមិដូចខាងក្រោម :
១-ត្រូវតាមដាន ត្រួតពិនិត្យ និងឱ្យលោកស្រី លាង ហ៊ីម កាយអាចម៍ដែលនៅសេសសល់ចេញវិញឱ្យអស់ តាមទំហំដែលរដ្ឋបាលខេត្តបានកំណត់
២-ត្រូវតាមដាន ត្រួតពិនិត្យ និងឱ្យលោកស្រី លាង ហ៊ីម ដាំដើមកោងកាង និងថែរក្សាព្រៃកោងកាងឡើងវិញ
៣-ក្នុងនាមអាជ្ញាធរមូលដ្ឋាន ត្រូវពង្រឹងការទប់ស្កាត់ តាមដាន ត្រួតពិនិត្យ និងចាត់វិធានការចំពោះអ្នកទន្ទ្រានកាន់កាប់ដីរដ្ឋឱ្យបានម៉ឺងម៉ាត់។
ប្រភព ៖ ទីចាត់ការអន្តរវិស័យសាលាខេត្តកោះកុង