ស្រុកកោះកុង ៖ ថ្ងៃពុធ ៨ កើត ខែអាសាឍ ឆ្នាំខាលចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៦ ខែកក្កដា ឆ្នាំ២០២២ លោកស្រី សឿ សាវី សមាជិកក្រុមប្រឹក្សាស្រុក និងប្រធានគ.ក.ស.ក ស្រុកកោះកុង បានដឹកនាំគណៈកម្មាធិការពិគ្រោះយោបល់កិច្ចការស្រ្តី និងកុមារស្រុកកោះកុង(គ.ក.ស.ក) សហការជាមួយអាជ្ញាធរឃុំឃុំត្រពាំងរូង ចុះជួបសំណេះសំណាលសួរសុខទុក្ខ និងនាំយកអំណោយសប្បុរសធម៌ ប្រគល់ជូនគ្រួសារងាយរងគ្រោះ រស់នៅចំណុចអូតាព្រំ ភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង ដែលមានកូនៗចំនួន ៤នាក់ មានការខ្វះខាតសម្លៀកបំពាក់ ឯកសណ្ឋានសិស្ស និងមធ្យោបាយក្នុងការធ្វើដំណើរទៅរៀនសូត្រ ព្រោះសាលារៀនមានចំងាយឆ្ងាយពីផ្ទះ។
ដោយសង្កេតឃើញពីផលលំបាករបស់កូនៗ គណៈកម្មាធិការពិគ្រោះយោបល់កិច្ចការស្រ្តី និងកុមារស្រុកកោះកុង បាននាំយកសម្ភារ និងថវិកាមួយចំនួនប្រគល់ជូនគ្រួសារងាយរងគ្រោះ។
ជាមួយគ្នានេះ ក្រុមការងារបានផ្តាំផ្ញើដល់ស្រ្តីដែលម្តាយ និងកូនៗ និងលើកទឹកចិត្តថែទាំសុខភាពឱ្យបានល្អ រក្សាអនាម័យក្នុងការរស់នៅ ជាពិសេសត្រូវមានស្មារតីរឹងប៉ឹង ត្រូវខិតខំតស៊ូប្រកបរបរចិញ្ចឹមជីវិតបន្តទៅមុខទៀត។
សម្ភារដែលផ្តល់ជូនរួមមាន៖ អង្ករ ៥០គក្រ ឯកសណ្ឋានសិស្ស ៤ឈុត ស្រី ២ឈុត ប្រុស ២ឈុត កង់ចំនួន ២គ្រឿង ដែលជាអំណោយលោកជំទាវ ចេង វន្នី សមាជិកក្រុមប្រឹក្សាខេត្ត និងជាសមាជិកគណៈកម្មាធិការពិគ្រោះយោបល់កិច្ចការស្រ្តី និងកុមារខេត្តកោះកុង និងថវិការបស់គណៈកម្មាធិការពិគ្រោះយោបល់កិច្ចការស្រ្តី និងកុមារស្រុកកោះកុងចំនួន ១០០ ០០០រៀល។
