រដ្ឋបាលខេត្តកោះកុង

លោក អន សុធារិទ្ធ អភិបាលរង នៃគណៈអភិបាលខេត្តកោះកុង បានដឹកនាំក្រុមការងារខេត្ត ចូលរួមវេទិកាពិគ្រោះយោបល់ និងទស្សនកិច្ចសិក្សាអំពីគម្រោង PROBLUE ស្តីពីសសរស្តម្ភនៃវិស័យវារីវប្បកម្ម និងទេសចរណ៍ នៅខេត្តព្រះសីហនុ និងខេត្តកោះកុង ដែលជាគម្រោងគាំទ្រដោយធនាគារពិភពលោក WorldBank នៅរីស៊ត Royal Sand នៃក្រុងកោះរ៉ុង ខេត្តព្រះសីហនុ។ កម្មវិធីនេះនឹងមានរយៈពេល៤ថ្ងៃ ចាប់ពីថ្ងៃទី០៤-០៧ ខែឧសភា ឆ្នាំ២០២៦ ដោយមានការចូលរួមពីតំណាងក្រសួងរៀបចំដែនដី នគរូបនីយកម្ម និងសំណង់ ក្រសួងទេសចរណ៍ ក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តព្រះសីហនុ រដ្ឋបាលខេត្តកោះកុង ក្រុមការងារនៃធនាគារពិភពលោក WorldBank និងវិស័យឯកជន។ គោលបំណងនៃវេទិកា គឺដើម្បីពិគ្រោះយោបល់លើសេចក្តីព្រាងរបាយកាណ៍ និងការសិក្សាគម្រោងPROBLUE ដែលជាគម្រោងពាក់ព័ន្ធនឹងសេដ្ឋកិច្ចសមុទ្រ( Blue Economy) ក្នុងគោលដៅអាទិភាពនៃទេសចរណ៍តំបន់ឆ្នេរសមុទ្រ និងវារីវប្បកម្មសមុទ្រ។ ក្រៅពីវេទិកាពិគ្រោះយោបល់ ក្រុមការងារក៏បានទស្សនកិច្ចសិក្សា និងជួបសម្ភាសន៍ជាមួយអាជ្ញាធរ និងតំណាងសហគមន៍នៅកោះរ៉ុង និងកោះរ៉ុងសន្លឹមអំពីបញ្ហាប្រឈម និងដំណោះស្រាយនៃការលើកកម្ពស់ជីវភាពរបស់សហគមន៍នៅតំបន់កោះទាំង២នេះ។