២២/០៩/២០២០ (វេលាម៉ោង ០៩:០០នាទីព្រឹក)
======================
លោក ហាក់ ឡេង ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកបូទុមសាគរ បានអោយក្រុមការងារអញ្ជើញទទួលទេយ្យទាន ជាគ្រឿងឧបភោគបរិភោគ មួយចំនួន ពីព្រះចៅអធិការវត្តពោធិរង្សី ហៅវត្តកណ្តោល ។
មានសង្ឃដីកានាឱកាសនោះ ព្រះតេជគុណ ទាំង៣ព្រះអង្គ មានការគាំទ្រ និងមានទឹកព្រះទ័យរីករាយ ចូលរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ក្នុងការជួយសង្គ្រោះ ក៏ដូចជាជួយសម្រាលទុក្ខលំបាករបស់ញោមញាតិទីទ័លក្រនៅគ្រប់ទីកន្លែង ។
ក្នុងឱកាសនោះដែរ ក្រុមការងារអនុសាខាស្រុកបាន ថ្លែងអំណរព្រះគុណ ចំពោះព្រះទ័យដ៏សប្បុរសធម៌របស់ព្រះតេជគុណ ក្នុងការយកព្រះទ័យទុកដាក់ប្រទាននូវទេយ្យទាន គ្រឿងឧបភោគបរិភោគ នេះ សបញ្ជាក់ពីព្រះទ័យដ៏មនុស្សធម៌ ចំពោះបងប្អូនប្រជាពលរដ្ឋរងគ្រោះ និងងាយរងគ្រោះ ។ ក្នុងកាយវិកាដ៏មនុស្សធម៌នេះ គឺជាការចូលរួមរបស់ព្រះសង្ឃក្នុងវិស័យអាណាចក្រ ជាមួយសកម្មភាពមនុស្សធម៌របស់ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។ គ្រឿងឧបភោគបរិភោគទាំងនេះ អនុសាខាកាកបាទក្រហមកម្ពុជា ស្រុកបូទុមសាគរ នឹងយកទៅប្រើប្រាស់ឲ្យចំគោលដៅមនុស្សធម៌ នៅពេលដែលប្រជាពលរដ្ឋយើងទទួលរងនូវគ្រោះមហន្តរាយផ្សេងៗ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាកាកបាទក្រហម អឌ្ឍចន្ទក្រហម។
ទេយ្យទានដែលបានទទួលមាន៖
អង្ករ ៤បាវ មី ៦កេស ទឹកត្រី ៤យួរ ទឹកស៊ីអ៉ីវ៤យួរ ស្ករស ០៧កញ្ចប់ អំបិល ១០កញ្ចប់ ទឹកផ្លែឈើ ១កេស ប្រេងសណ្តែក២ធុង ត្រីខ៦យួរ ទឹកដោះគោ ៧កំប៉ុង និងថវិការចំនួន ២០០,០០០រៀល ។
ប្រភពៈ រដ្ឋបាលស្រុកបូទុមសាគរ
=====================
ថ្ងៃអង្គារ ៥ កើត ខែអស្សុជ ឆ្នាំជូត
ទោស័ក ពុទ្ធសករាជ ២៥៦៤
ត្រូវនឹងថ្ងៃទី២២ ខែកញ្ញា ឆ្នាំ២០២០
September 22, 2020
