រដ្ឋបាលខេត្តកោះកុង

លោកជំទាវ ឈី វ៉ា អភិបាល នៃគណៈអភិបាលខេត្តកោះកុង បានអញ្ជើញស្វាគមន៍ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល ក្នុងពិធី«ប្រកាសតែងតាំងប្រធានមន្ទីររ៉ែនិងថាមពលខេត្តកោះកុង»។

លោកជំទាវអភិបាលខេត្ត បានលើកឡើងថា នាងខ្ញុំសូមយកឱកាសនេះ សម្តែងនូវការកោតសសើរដ៏ស្មោះចំពោះថ្នាក់ដឹកនាំ និងមន្ត្រី នៃមន្ទីររ៉ែនិងថាមពលខេត្តកោះកុង ដែលបានខិតខំបំពេញការងាររបស់ខ្លួន ក្នុងនាមអង្គភាព ថ្នាក់ក្រោមជាតិ ដែលជាសេនាឱ្យក្រសួងរ៉ែនិងថាមពល និងរដ្ឋបាលខេត្ត តាមបេសកកម្ម ជំនាញរបស់ខ្លួន បានយ៉ាងល្អប្រសើនាពេលកន្លងមក។ លទ្ធផលការងារសម្រេចបានកន្លងទាំងនេះពិតជាមានការចូលរួមចំណែកយ៉ាងធំធេងពីលោក ប៉ិច ស៊ីយ៉ុន អតីតប្រធានមន្ទីរឧស្សាហកម្ម រ៉ែនិងថាមពល ហើយបច្ចុប្បន្នមន្ទីររ៉ែនិងថាមពល ដែលបានបំពេញការងារជាប្រធានមន្ទីរ រយៈពេល ១៩ ឆ្នាំ គឺចាប់ពីឆ្នាំ ២០០៥ រហូតដល់ឆ្នាំ២០២៤។ ជាមួយនឹងការកោតសសើរនេះ នាងខ្ញុំសូមសម្តែងនូវការនឹករលឹកផងដែរ ដែលលោកប្រធានត្រូវបានចូលនិវត្តន៍ កាលពីឆ្នាំ២០២៤ កន្លងទៅ ហើយក៏សូមចូលរួម អបអរសាទរចំពោះលោក ខ្លឹម យុនពិសិដ្ឋ ដែលបានរាជរដ្ឋាភិបាលបានផ្តល់ទំនុកចិត្តតែងតាំង ជាប្រធានមន្ទីរ ហើយដែលកំពុងប្រារព្ធពិធី ប្រកាសតែងតាំងនាពេលនេះ។ នាងខ្ញុំសង្ឃឹមថាលោក ខ្លឹម ឃុនពិសិដ្ឋ ដែលទទួល តំណែងថ្មី ពិតជានាំយកនូវសមត្ថភាព បទពិសោធន៍ ចំណេះដឹង និងជំនាញបន្តនូវប្រពៃណីដឹកនាំល្អ ពីលោក ប៉ិច ស៊ីយ៉ុន ប្រធានមន្ទីរ ចាស់ក្នុងទិសដៅសម្រេច ឱ្យបាននូវបេសកកម្មរបស់មន្ទីរ រ៉ែនិងថាមពល ហើយសំដៅរួមចំណែក ក្នុងការអភិវឌ្ឍ កសាងប្រទេសជាតិរបស់យើង ក្នុងតួនាទីជារដ្ឋបាលថ្នាក់ក្រោមជាតិជាពិសេសរួមចំណែកអភិវឌ្ឍន៍ខេត្ត កោះកុងរបស់យើង។ ក្នុងឱកាសនេះ នាងខ្ញុំ ក៏សូមសំណូមពរដល់បណ្តាមន្ទីរ អង្គភាព រដ្ឋបាលក្រុង ស្រុក អាជ្ញាធរមូលដ្ឋាន មន្ត្រីរាជការគ្រប់លំដាប់ថ្នាក់ សូមសហការឱ្យបានល្អ ជាមួយលោកប្រធាន មន្ទីរថ្មី ដើម្បីលោកបានបន្តដឹកនាំការងារមន្ទីររ៉ែនិងថាមពលខេត្តឱ្យទទួលបាន ជោគជ័យបន្ថែមទៀត៕
ថ្ងៃសុក្រ ៨កើត ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៨ ខែវិច្ឆិកា ឆ្នាំ២០២៥