រដ្ឋបាលខេត្តកោះកុង

លោក អ៊ុក ភ័ក្ត្រា អភិបាលរង នៃគណៈអភិបាលខេត្តកោះកុង បានអញ្ជើញជាអធិបតី ក្នុងវគ្គបណ្តុះបណ្តាល ស្តីពីនីតិវិធីអនុវត្តកម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងរងគ្រោះក្នុងអំឡុងពេលប្រយុទ្ធប្រឆាំងនឹងជំងឺកូវីដ-១៩ ដោយមានការចូលរួមពី លោក លោកស្រី ដែលជាអ្នកកាន់កម្មវិធីមកពីឃុំ សង្កាត់ ទូទាំងខេត្តកោះកុង។

លោកអភិបាលរងខេត្ត បានគូសបញ្ជាក់ថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ គឺជាកម្មវិធីអន្តរាគមន៍មួយ របស់រាជរដ្ឋាភិបាលកម្ពុជា ក្នុងដំណាក់កាលមានការរីករាលដាលជំងឺកូវីដ-១៩ សម្រាប់គ្រួសារដែលមានប័ណ្ណសមធម៌ប្រភេទទី១ និង២។ ការគ្រប់គ្រងការដឹកនាំ និងការសម្របសម្រួលអនុវត្តកម្មវិធី និងប្រើប្រាស់រចនាសម្ព័ន្ធស្ថាប័នដែលមានស្រាប់ របស់កម្មវិធីផ្តល់សាច់ប្រាក់ ជូនស្ត្រីមានផ្ទៃពោះ និងកុមារអាយុក្រោម២ ឆ្នាំ ដើម្បីធានានិរន្តរភាព និងការលើកកម្ពស់ប្រសិទ្ធភាពការចំណាយទាំងនៅថ្នាក់ជាតិ និងថ្នាក់ក្រោមជាតិ។ ដើម្បីធានាបាននូវប្រសិទ្ធភាពក្នុងការអនុវត្តកម្មវិធីនេះ ក្រសួង បានណែនាំរួចមកហើយ មន្ទីរបានបន្តរៀបចំវគ្គបណ្ដុះបណ្ដាល ដោយផ្តោតសំខាន់ទៅលើបច្ចេកទេស ក្នុងការអនុវត្តកម្មវិធី តាមប្រព័ន្ធបច្ចេកវិទ្យា(តាភ្លែត)។ វគ្គបណ្ដុះបណ្ដាលនេះផ្តោតសំខាន់ទៅលើ ១-កំណត់ឲ្យបាននូវបញ្ហាប្រឈម បើកំពុងកើតមានលើប្រព័ន្ធ CTP-WC និងរកវិធីសាស្ត្រដោះស្រាយ ២-ខិតខំត្រង់ត្រាប់ស្ដាប់បទបង្ហាញរបស់លោកគ្រូ អ្នកគ្រូអំពីការប្រើប្រាស់មុខងារថ្មី អែបថ្មី និង៣-ទទួលអនុវត្តផែនការសកម្មភាពបន្ត៕