ថ្ងៃទី៣០ ខែតុលា ឆ្នាំ២០២៤ លោក ជា សុីវត្រា ប្រធានមន្ទីរផែនការខេត្តកោះកុង ដឹកនាំក្រុមការងារមន្ទីរ ៣នាក់ ចូលរួមវគ្គបណ្តុះបណ្តាល ស្តីពីស្ថិតិប្រជាសាស្រ្ត ដល់មន្រ្តីមន្ទីរផែនការរាជធានី ខេត្ត ក្រោមអធិបតីភាព ឯកឧត្តម រិន វីរៈ ទីប្រឹក្សាផ្ទាល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជារដ្ឋលេខាធិការក្រសួងផែនការ នឹងមានការអញ្ជើញចូលរួមពី លោក លោកស្រីប្រធាន អនុប្រធានមន្ទីរ និងមន្រ្តីជំនាញពាក់ព័ន្ធមកពីបណ្ដាខេត្តចំនួន៧ រួមមាន តាកែវ កែប កំពត ព្រះសីហនុ កោះកុង កំពង់ស្ពឺ និងកណ្តាល រយៈពេល ៣ថ្ងៃ (ថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ឆ្នាំ២០២៤) នៅមន្ទីរផែនការខេត្តតាកែវ ។ វគ្គបណ្តុះបណ្តាលនេះមានគោលបំណង ដើម្បីពង្រឹងសមត្ថភាព មន្រ្តីមន្ទីរផែនការទាំង ៧ខេត្ត លើជំនាញ និងលើកកម្ពស់ការយល់ដឹងអំពីទស្សនទានជាមូលដ្ឋានសំខាន់ៗរបស់ស្ថិតិប្រជាសាស្រ្ត ដូចជាទំហំគ្រួសារ ការបែងចែករបាយការណ៍ប្រជាជន តាមតំបន់ភូមិសាស្រ្ត សមាសធាតុប្រជាជន (អាយុ ភេទ ជាតិព័ន្ធ និងចរិតលក្ខណៈផ្សេងៗទៀត) ការផ្លាស់ប្តូរបម្រែបម្រួលប្រជាសាស្រ្ត កំណើត លទ្ធផលមានកូន មរណៈភាព ចំណាកស្រុក ជាដើម ព្រមទាំងវិធីសាស្រ្តគណនា។
