លោក សុខ សុទ្ធី អភិបាលរងខេត្តកោះកុង អញ្ជើញដឹកនាំកិច្ចប្រជុំពិភាក្សា ដើម្បីវាយតម្លៃ លើប្រជាពលរដ្ឋដែលស្នើសូមដីសម្បទានសង្គមកិច្ច

លោក សុខ សុទ្ធី អភិបាលរងខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សាដើម្បីវាយតម្លៃ លើប្រជាពលរដ្ឋក្នុងស្រុកស្រែអំបិលដែលស្នើសូមដីសម្បទានសង្គមកិច្ច។ ការវាយតម្លៃ ដាក់ពិន្ទុ លើប្រជាពលរដ្ឋដែលស្នើសុំដីសម្បទានសង្គមកិច្ចនេះ គឺជាការពិនិត្យ វាយតម្លៃដោយផ្ទាល់ពី មេភូមិ និងមេឃុំ ដែលជាអាជ្ញាធរមូលដ្ឋាន ស្គាល់ និងដឹងអំពីស្ថានភាពជាក់ស្តែងរបស់ប្រជាពលរដ្ឋ ។ ប្រជាពលរដ្ឋដែលនឹងត្រូវទទួលបានដីសម្បទានសង្គមកិច្ចពីរដ្ឋបាលខេត្ត គឺជាប្រជាពលរដ្ឋក្រីក្រី គ្មានផ្ទះ គ្មានដី និងត្រូវបានបែងចែកជាពីរប្រភេទ គឺ ប្រភេទ អាទិភាពទី១ និង ប្រភេទអាទិភាពទី២។ ជាបឋម ក្នុងចំណោមប្រជាពលរដ្ឋ ប្រមាណជាង ២៥០០គ្រួសារដែលស្នើសូមដីសម្បទានសង្គមកិច្ចហើយមានលក្ខណៈសមស្រប ជាប្រភេទអាទិភាពទី១ មានចំនួន៥៩ គ្រួសារ និង អាទិភាពទី២ មានចំនួន ១៤៨គ្រួសារ។ តាមរយៈកិច្ចប្រជុំនេះ លោក សុខ សុទ្ធី បានបញ្ជាក់ថា ឈ្មោះដែលត្រូវបានវាយតម្លៃ ជ្រើសរើសនៅពេលនេះ នឹងត្រូវលើកយកមកពិនិត្យវាយតម្លៃបន្ថែមទៀតនៅដើមខែកក្កដា ឆ្នាំ២០២៤ ដោយមានការចូលរួមពីតំណាងប្រជាពលរដ្ឋផងដែរ។
ថ្ងៃពុធ ១៣ កើត ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩ ខែមិថុនា ឆ្នាំ២០២៤ June 19, 2024