រដ្ឋបាលខេត្តកោះកុង

លោក ហាក់ ឡេង អភិបាលរង នៃគណៈអភិបាលខេត្ត តំណាងដ៏ខ្ពង់ខ្ពស់លោកជំទាវអភិបាល នៃគណៈអភិបាលខេត្តកោះកុង បានដឹកនាំក្រុមការងារខេត្ត អាជ្ញាធរស្រុក ឃុំ និងភូមិ នាំយកឈើចំនួន០៤គូប និងដែកគោលចំនួន១០សុង ដែលជាអំណោយដ៏ថ្លៃថ្លារបស់លោកជំទាវ មិថុនា ភូថង អភិបាល នៃគណៈអភិបាលខេត្ត ជូនដល់ប្រជាពលរដ្ឋសម្រាប់ជួសជុលស្ពានឈើមានជើង នៅចំណុចអាវឡាតាន់ ស្ថិតនៅឃុំជ្រោយប្រស់ ស្រុកកោះកុង ដែលរងនូវការខូចខាតដោយសារគ្រោះធម្មជាតិ។

ដោយមានការយកចិត្តទុកដាក់ពីលោកជំទាវ មិថុនា ភូថង អភិបាល នៃគណៈអភិបាលខេត្ត ជានិច្ចកាលតែងតែយកចិត្តទុកដាក់ដល់សុខទុក្ខរបស់ប្រជាពលរដ្ឋ និងដោយមើលឃើញពីការខូចខាតស្ពាននោះ មានចំនួន ៧ទីតាំង មានប្រវែង១០០ម៉ែត្រ ក្នុងប្រវែងសរុប ចំនួន៥៧០ម៉ែត្រ ដែលការខូចខាតនេះធ្វើឱ្យប៉ះពាលដល់ការរស់នៅរបស់ប្រជាពលរដ្ឋ ជាពិសេសក្មេងៗធ្វើដំណើរទៅសិក្សា និងចាស់ជរាធ្វើដំណើរទៅធ្វើបុណ្យទាន ព្រមទាំងការរស់នៅប្រកបរបរប្រចាំថ្ងៃរបស់ប្រជាពលរដ្ឋនៅតំបន់នោះបានចាត់លោក ហាក់ ឡេង អភិបាលរង នៃគណៈអភិបាលខេត្ត នាំយកឈើចំនួន០៤គូប និងដែកគោលចំនួន១០សុង ជូនដល់ប្រជាពលរដ្ឋសម្រាប់ជួសជុសស្ពាននោះ ដើម្បីសម្រួលដល់ការរស់នៅរបស់ប្រជាពលរដ្ឋ។

ជាចុងបញ្ចប់ប្រជាពលរដ្ឋនៅទីនោះ បានសាទរ និងថ្លៃងអំណរគុណដល់លោកជំទាវអភិបាលខេត្ត ដែលតែងតែយកចិត្តទុកដាក់ដល់សុខទុក្ខប្រជាពលរដ្ឋ និងបាននាំយកឈើ និងសម្ភារៈមួយចំនួនមកជូនដើម្បីជួសជុលស្ពាននោះ។
ថ្ងៃពុធ ១ កើត ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៣ ខែធ្នូ ឆ្នាំ២០២៣