លោក លី ច័ន្ទរាសី អភិបាលរង នៃគណៈអភិបាលស្រុកស្រែអំបិល ដឹកនាំក្រុមការងារចុះវាស់កម្ដៅអ្នកដំណើរចូលមកស្រុកស្រែអំបិល តាមបណ្ដោយផ្លូវជាតិលេខ៤៨ នៅចំណុចប៉ុស្តិ៍រដ្ឋបាលនគរបាលឃុំបឹងព្រាវ ស្រុកស្រែអំបិល ខេត្តកោះកុង
ស្រុកស្រែអំបិល៖ បច្ចុប្បន្នរាជរដ្ឋាភិបាលកម្ពុជា និងរដ្ឋបាលខេត្តកោះកុង បាននិងកំពុងខិតខំយកចិត្តទុកដាក់ក្នុងការផ្សព្វផ្សាយ បង្ការ និងចាត់វិធានការមួយចំនួនក្នុងការទប់ស្កាត់ការរាតត្បាតនៃជំងឺកូវីដ១៩(Covid-19)។ ដើម្បីចូលរួមក្នុងការទប់ស្កាត់ការរាតត្បាតនេះ នៅថ្ងៃទី២៨ ខែមីនា ឆ្នាំ២០២០ លោក លី ច័ន្ទរាសី អភិបាលរង នៃគណៈអភិបាលស្រុកស្រែអំបិល ក្រោមការណែនាំរបស់ លោកអភិបាល នៃគណៈអភិបាលស្រុក បានដឹកនាំក្រុមការងារចុះវាស់កម្ដៅអ្នកដំណើរចូលមក ឬឆ្លងកាត់ស្រុកស្រែអំបិល តាមបណ្ដោយផ្លូវជាតិលេខ៤៨ នៅចំណុចប៉ុស្ដិ៍រដ្ឋបាលនគរបាលឃុំបឹងព្រាវ ស្រុកស្រែអំបិល ខេត្តកោះកុង។ បើគិតត្រឹមវេលាម៉ោង ១១:៣០ នាទីព្រឹក នាថ្ងៃខែឆ្នាំដដែលនេះ ក្រុមការងារបានធ្វើការវាស់កម្ដៅអ្នកដំណើរសរុបបានចំនួនប្រមាណ ៥០០នាក់ តែពុំមានករណីសង្ស័យនោះទេ។
ប្រភព៖ ប៊ួ សុភា
