រដ្ឋបាលខេត្តកោះកុង

រដ្ឋបាលខេត្តកោះកុង សូមគោរពជម្រាបជូន ឯកឧត្តម លោកជំទាវ មន្រ្តីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋគ្រប់មជ្ឈដ្ឋានទាំងអស់មេត្តាជ្រាបថា ដើម្បីអបអរសាទរខួបទី៤៣ នៃទិវាជ័យជម្នះលើរបបប្រល័យពូជសាសន៍ (៧ មករា ១៩៧៩ – ៧ មករា ២០២២) រដ្ឋបាលខេត្តកោះកុង សហការជាមួយរដ្ឋបាលស្រុកបូទុមសាគរនឹងរៀបចំពិធីបរិច្ចាគឈាមដោយស្ម័គ្រចិត្ត ចំនួន ៥០០នាក់ នៅថ្ងៃទី០៨ ខែមករា ឆ្នាំ២០២២ វេលាម៉ោង ០៨:០០នាទីព្រឹក នៅបរិវេណសាលា ស្រុកបូទុមសាគរ ស្ថិតក្នុងឃុំអណ្តូងទឹក ស្រុកបូទុមសាគរ ខេត្តកោះកុង ដើម្បីបរិច្ចាគឈាមជូនមជ្ឈមណ្ឌលជាតិផ្តល់ឈាម សម្រាប់ជួយសង្គ្រោះអាយុជីវិត ជនរងគ្រោះដោយកង្វះឈាម។
រដ្ឋបាលខេត្តកោះកុង សូមអំពាវនាវដល់ ឯកឧត្តម លោកជំទាវ មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋគ្រប់មជ្ឈដ្ឋានទាំងអស់ ចូលរួមបរិច្ចាគឈាមដោយស្ម័គ្រចិត្ត តាមពេលវេលា និងទីកន្លែង ដែលបានជម្រាបជូនខាងលើ តាមការគួរ។

ទទួលបានលិខិតអំពាវនាវ នេះ រដ្ឋបាលខេត្តកោះកុង មានសង្ឃឹមជឿជាក់នូវទឹកចិត្តសប្បុរសធម៌ ចូលរួមពីសំណាក់ ឯកឧត្តម លោកជំទាវ អស់លោក លោកស្រីទាំងអស់ ក្នុងស្មារតីមនុស្សធម៌ និង វប្បធម៌ចែករំលែក។