លោក សុខ សុទ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង បានអញ្ជើញធ្វើសន្និសីទសារព័ត៌មានពាក់ព័ន្ធនឹងការចាក់ដីរំលោភចំណីព្រែក ស្ថិតនៅឃុំទួលគគីរ ស្រុកមណ្ឌលសីមា ខេត្តកោះកុង
លោក សុខ សុទ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង បានអញ្ជើញធ្វើសន្និសីទសារព័ត៌មានពាក់ព័ន្ធនឹងការចាក់ដីរំលោភចំណីព្រែក ស្ថិតនៅឃុំទួលគគីរ ស្រុកមណ្ឌលសីមា ខេត្តកោះកុង
លោក សុខ សុទ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង ដោយមានការអនុញ្ញាត និងណែនាំពីលោកជំទាវ មិថុនា ភូថង អភិបាលនៃគណៈអភិបាលខេត្ត បានធ្វើសន្និសីទសារព័ត៌មានពាក់ព័ន្ធនឹងការចាក់ដីរំលោភចំណីព្រែក ស្ថិតនៅឃុំទួលគគីរ ស្រុកមណ្ឌលសីមា ខេត្តកោះកុង។ ក្នុងសន្និសីទនេះ លោក សុខ សុទ្ធីបញ្ជាក់ថា៖
-ទីតាំងចាក់អាចម៌ដីរំលោភចូលព្រៃកោងកាងនៅឃុំទទួលគគីរ ស្រុកមណ្ឌលសីមា គឺជាកម្មសិទ្ធិរបស់ឈ្មោះ លាង ហ៊ីម (ហៅ មាហ្គោល) ដែលគាត់បានអះអាងថា ទីតាំងដីនេះ៖
•មួយផ្នែកគាត់បានទិញពីប្រជាពលរដ្ឋ និងមេឃុំ (ដីសហគមន៍) មានទំហំប្រហែល ១២ហិកតា ជាថ្នូនឹងគាត់ធ្វើផ្លូវ លូរំដោះទឹក និងតារាងបាល់
•មួយផ្នែកទៀត (មានព្រៃកោងកាង) ហើយមុនមានការកាត់ឆ្វៀល ដីនេះស្ថិតនៅក្នុងអនុក្រឹត្យ១៧៩ ស្តីពីការបង្កើតដែនជម្រកសត្វព្រៃពាមក្រសោប
-ដីដែលបានចាក់រំលោភចូលចំណីព្រែក (ព្រៃកោងកាង) មានទំហំ ៣.៣០២ម៉ែត្រការ៉េ
ចំពោះវិធានការ លើអ្នកប្រព្រឹត្តល្មើស លោក សុខ សុទ្ធី បញ្ជាក់ថា៖
-ជាវិធានរដ្ឋបាល ទីតាំងដែលចាក់ដីរំលោភចូលចំណីព្រែកនោះ (ព្រៃកោងកាង) គឺរដ្ឋបាលខេត្តឱ្យអ្នកចាក់ដីរំលោភចំណីព្រែក (ព្រៃកោងកាង) ត្រូវកាយអាចម៍ដីដែលចាក់រំលោភចូល ចេញវិញ ហើយត្រូវស្តារព្រៃកោងកាងឡើងវិញ។
-ចំពោះការដាក់ទោសទណ្ឌនោះ (វិធានច្បាប់) គឺទុកលទ្ធភាពជូនព្រះរាជអាជ្ញានៃអយ្យការអមសាលាដំបូងខេត្តកោះកុងអនុវត្តនីតិវីធីច្បាប់។
-ចំពោះទីតាំងដែលអះអាងថា ដីសហគមន៍ដែលបានលក់ ទិញ រដ្ឋបាលខេត្តនឹងចុះសិក្សាលម្អិត ថាដីនោះជាកម្មសិទ្ធិរបស់ប្រជាពលរដ្ឋប្រាកដមែន ឬអាជ្ញាធរឃុំជាអ្នកចាត់ចែង ហើយការចាត់ចែងនោះសមស្របតាមអ្វីដែលជាប្រយោជន៍សហគមន៍ឬទេ ដើម្បីមានវិធានការបន្តទៀត
ជាចុងក្រោយ លោក សុខ សុទ្ធី អភិបាលរងខេត្ត និងជាអ្នកនាំពាក្យរដ្ឋបាលខេត្តកោះកុង បានថ្លែងអំណរគុណអ្នកសារព័ត៌មានដែលបានចូលរួមក្នុងថ្ងៃនេះ និងបានផ្តែផ្តាំ ណែនាំ សំណូមពរដល់បងប្អូនប្រជាពលរដ្ឋចូលរួមអភិរក្ស ថែរក្សា ការពារ សម្បត្តិធម្មជាតិរបស់ជាតិយើង បញ្ឈប់សកម្មភាពទន្ទ្រានកាន់កាប់ដីរដ្ឋ និងចូលរួមអភិវឌ្ឍសង្គមជាតិយើងទាំងអស់គ្នា។ នៅក្នុងបរិបទនៃជំងឺកូវីដ១៩នេះ សូមបងប្អូនប្រជាពលរដ្ឋចូលរួមប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ ទាំងអស់គ្នា ដោយអនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ នូវវិធានការ ការពារកូវីដ១៩ គឺ ៣កុំ ៣ការពារ។
