រដ្ឋបាលខេត្តកោះកុង

លោក សុខ សុទ្ធី អភិបាលរង នៃគណៈអភិបាលខេត្ត ដោយមានការ អនុញ្ញាត និងណែនាំពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានដឹកនាំកិច្ចប្រជុំដើម្បីធ្វើការពិនិត្យ ផ្ទៀងផ្ទាត់ទិន្នន័យ ផែនទី និងនិយាមកាដី ដែលរដ្ឋបាលខេត្តកោះកុង បានធ្វើការស្នើសូមកាត់ឆ្វៀល ដីចេញពីតំបន់ការពារធម្មជាតិ និងរបៀងអភិរក្សជីវៈចម្រុះ។ ការពិនិត្យផ្ទៀងផ្ទាត់នេះ គឺពិនិត្យផ្ទៀងផ្ទាត់ទិន្នន័យ ផែនទី និងនិយាមកាដី រវាងទិន្នន័យ ផែនទី និយាមកា ដែលក្រសួងបរិស្ថានបានផ្ញើមករដ្ឋបាលខេត្ត ជាមួយ​ទិន្នន័យ ផែនទី និងនិយាមកាដីដែលរដ្ឋបាលខេត្តបានធ្វើការស្នើសុំកាត់ឆ្វៀល។ ផ្ទៃដីដែលរដ្ឋបាលខេត្តកោះកុង ធ្វើការស្នើសូមកាត់ឆ្វៀលដីចេញពីតំបន់ការពារធម្មជាតិ និងរបៀងអភិរក្សជីវៈចម្រុះ មានទំហំសរុបប្រមាណ ១៥ ម៉ឺនហិកតា ដែលក្នុងនោះ​មាន​ ៖ កាត់ឆ្វៀលជូនប្រជាពលរដ្ឋដែលរស់នៅអាស្រ័យផលយូឆ្នាំក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ទុកជាទីលានចាក់សំរាម និងទុកជាដីបំរុងរបស់រដ្ឋបាលខេត្ត ដែលជាទ្រព្យសម្បត្តិឯកជនរបស់រដ្ឋ។
សមាសភាពចូលរួមកិច្ចប្រជុំនេះ រួមមាន មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរកសិកម្ម រុក្ខាប្រមាញ់ និងនេសាទ តំំំំណាងមន្ទីរបរិស្ថាន លោកនាយករងរដ្ឋបាលសាលាខេត្ត និងលោកនាយកទីចាត់ការអន្តរវិស័យ៕