កិច្ចប្រជុំពង្រឹងក្រុមការងារប្រចាំការនៅតាមមណ្ឌលចត្តាឡីស័ក និងកន្លែងផ្សេងៗ ក្នុងខេត្តកោះកុង
នៅមន្ទីរសុខាភិបាល ននៃរដ្ឋបាលខេត្តកោះកុង លោក ទូ សាវុធ អភិបាលរង នៃគណៈអភិបាលខេត្តកោះកុង បានដឹកនាំកិច្ចប្រជុំក្រុមការងារប្រចាំការនៅតាមមណ្ឌលចត្តាឡីស័ក និងកន្លែងផ្សេងៗ ក្នុងខេត្តកោះកុង ដោយមានការអញ្ជើញចូលរួមពីប្រធានមន្ទីរសុខាភិបាល នៃរដ្ឋបាលខេត្ត កម្លាំងកងរាជអាវុធហត្ថខេត្ត កម្លាំងស្នងការដ្ឋាននគរបាលខេត្ត និងមន្ត្រីជំនាញពាក់ព័ន្ធមួយចំនួនទៀត។
ថ្លែងក្នុងកិច្ចប្រជុំនេះ លោកអភិបាលរង នៃគណៈអភិបាលខេត្តកោះកុង បានមានប្រសាសន៍ជំរុញឱ្យក្រុមការងារប្រចាំការនៅតាមមណ្ឌលចត្តាឡីស័ក និងកន្លែងផ្សេងៗ យកចិត្តទុកដាក់ពង្រឹងការងារបន្ថែមទៀត និងមានការប្រុងប្រយ័ត្នខ្ពស់លេីការងារទទួលពលករដាក់ធ្វេីចត្តាឡីស័កក្នុងមណ្ឌលទាំងបី ដោយអនុវត្តឱ្យបានល្អតាមវិធានសុខាភិបាល ជាពិសេសកម្លាំងសមត្ថកិច្ចត្រូវការពារយាមកាមឱ្យបានហ្មត់ចត់ ហើយក្រុមការងារដែលប្រចាំការនៅមណ្ឌលត្រូវមានក្រមសីលធម៌ចំពោះពលករ។ ជាមួយគ្នានេះ លោកអភិបាលរងខេត្ត បានស្នេីឱ្យក្រុមការងារទាំងអស់ពង្រឹងកិច្ចសហការ និងបង្កេីតគ្រុបតេឡេក្រាមងាយស្រួលផ្តល់ព័ត៌មាន និងដោះស្រាយបញ្ហា៕
