រដ្ឋបាលខេត្តកោះកុង

ភ្នំពេញ | លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង និង ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនបានចុះហត្ថលេខាលើកិច្ចសន្យាផ្តល់ជំនួយរបស់រដ្ឋាភិបាលជប៉ុន បានផ្តល់ជំនួយសម្រាប់គម្រោងទ្រង់ទ្រាយតូចសន្តិសុខមនុស្សជាតិ, KUSANONE, នូវថវិកាសរុបចំនួន ៣៩២,៣៧១ ដុល្លារអាមេរិក សម្រាប់ការសាងសង់ផ្លូវក្នុងស្រុកបូទុមសាគរ ខេត្តកោះកុង ការស្តារប្រព័ន្ធធារាសាស្រ្តក្នុងខេត្តកំពង់ឆ្នាំង និង ពង្រឹងសហគមន៍កសិកម្មក្នុងខេត្តមណ្ឌលគីរី។

ក្នុងគម្រោងសម្រាប់មន្ទីរសាធារណការ និងដឹកជញ្ជូនខេត្តកោះកុង រដ្ឋាភិបាលជប៉ុនបានផ្តល់ថវិកា ១៩៦,៣៥០ ដុល្លាអាមេរិក សម្រាប់ការកែលម្អផ្លូវដើម្បីធានាអោយបាននូវសុវត្ថិភាពក្នុងការឆ្លងកាត់សម្រាប់ប្រជាជនក្នុងតំបន់ នៅក្នុងស្រុកបូទុមសាគរ ខេត្តកោះកុង ។ គម្រោងនេះត្រូវបានរំពឹងថានឹងផ្តល់អត្ថប្រយោជន៍ដល់ប្រជាជនជាង ២,៤០០នាក់ តាមរយះការផ្តល់នូវលទ្ធភាពទទួលបានសេវាសាធារណៈប្រសើរជាងមុនដូចជាសាលារៀន ផ្សារ និងមណ្ឌលសុខភាពជាដើម ព្រមទាំងបង្កើនសកម្មភាពសេដ្ខកិច្ចក្នុងតំបន់តាមរយៈការធ្វ់ឲ្យសកម្មភាពដឹកជញ្ជូនកាន់តែរលូន នឹងជួយក្នុងការកែលម្អគុណភាពជីវិតសម្រាប់ប្រជាជននៅក្នុងតំបន់នៃគម្រោង។