លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សាករណីប្រជាពលរដ្ឋចូលកាន់កាប់ដីមានបណ្ណកម្មសិទ្ធិរបស់មន្ទីរកសិកម្ម រុក្ខាប្រមាញ់ និងនេសាទខេត្តកោះកុង។
លោក សុខ សុទ្ធី អភិបាលរងខេត្ត និងជាប្រធានក្រុមការងារចុះពិនិត្យ ស្រាវជ្រាវទីតាំងដីដែលប្រជាពលរដ្ឋបានចូលកាន់កាប់លើទីតាំងដីមានបណ្ណកម្មសិទ្ធិ ស្ថិតនៅភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បានដឹកនាំសមាជិកក្រុមការងារ ដើម្បីប្រជុំពិភាក្សារកដំណោះស្រាយលើករណីប្រជាពលរដ្ឋចូលកាន់កាប់ដីមានបណ្ណសម្គាល់សិទ្ធិកាន់កាប់ប្រើប្រាស់ដីធ្លីលេខ A1 ០៩១៣ និងបណ្ណសម្គាល់សិទ្ធិកាន់កាប់អចលនវត្ថលេខ A1 កក១៧២៩ ដែលគ្រប់គ្រងដោយមន្ទីរកសិកម្ម រុក្ខាប្រមាញ់ និងនេសាទខេត្តកោះកុង។ កិច្ចប្រជុំនេះមានសមាសភាពចូលរួមដូចជា ព្រះរាជអាជ្ញារងនៃសាលាដំបូងខេត្តកោះកុង នាយកទីចាត់ការអន្តរវិស័យ លោកប្រធានមន្ទីរកសិកម្ម រុក្ខាប្រមាញ់ និងនេសាទ តំណាងមន្ទីររៀបចំដែនដី នគរូបនីយកម្ម និងសំណង់ អភិបាលរងក្រុងខេមរភូមិន្ទ ប្រធានការិយាល័យភូមិបាលក្រុងខេមរភូមិន្ទ ចៅសង្កាត់ស្មាច់មានជ័យ និងអ្នកពាក់ព័ន្ធ។
ពាក់ព័ន្ធនឹងទីតាំងដីខាងលើនេះ ក្រុមការងារខណ្ឌរដ្ឋបាលព្រៃឈើខេត្តកោះកុងបានចុះស្រង់ទិន្នន័យជាក់ស្តែងឃើញថា ក្នុងទីតាំងដីនោះមានចំនួន ១៥២ក្បាលដី និងផ្ទះចំនួន ៧០ខ្នង។
ក្នុងកិច្ចប្រជុំនេះ គឺលោក សុខ សុទ្ធី អភិបាលរងខេត្ត បានណែនាំឱ្យ៖
១-មន្ទីរកសិកម្ម រុក្ខាប្រមាញ់ និងនេសាទ ធ្វើរបាយការណ៍លម្អិតពាក់ព័ន្ធនឹងចំនួនគ្រួសារ ទំហំ ក្បាលដី ផ្ទះ របស់ប្រជាពលរដ្ឋក្នុងទីតាំងដីនេះ
២-មន្ទីររៀបចំដែនដី នគរូបនីយកម្ម និងសំណង់ ត្រូវរង់ចាំឱ្យមានការដោះស្រាយបញ្ហារួចរាល់នូវទីតាំងដីខាងលើនេះសិន ទើបអាចចេញបណ្ណកម្មសិទ្ធិបាន
៣-អាជ្ញាធរមូលដ្ឋាន ចេញលិខិតផ្សព្វផ្សាយដល់ប្រជាពលរដ្ឋដែលរស់នៅក្នុងទីតាំងដីមានទំនាស់ខាងលើ ត្រូវរក្សានូវស្ថានភាពដើម ដោយមិនឱ្យមានការសាង់សង់ រុះរើអ្វីឡើយ រហូតទាល់តែមានដំណោះស្រាយ៕
