លោក ឈិត រតនៈ អភិបាលរង នៃគណៈអភិបាលខេត្តកោះកុង បានអញ្ជើញ ជាអធិបតីដឹកនាំកិច្ចប្រជុំ ដើម្បីពង្រឹងការអនុវត្តការងារឱ្យកាន់តែមានប្រសិទ្ធភាព រហ័សទាន់ពេលវេលា និងផ្តល់សេវាសាធារណៈ បានកាន់តែល្អប្រសើរបន្ថែមទៀត។

លោកអភិបាលរងខេត្ត បានលើកឡើងថា ដើម្បីពង្រឹងការអនុវត្តការងារឱ្យកាន់តែមានប្រសិទ្ធភាព រហ័សទាន់ពេលវេលា និងផ្តល់សេវាសាធារណៈ បានកាន់តែល្អប្រសើរបន្ថែមទៀត សូមលោក លោកស្រីទាំងអស់យកចិត្តទុកដាក់អនុវត្តតាមច្បាប់ គោលការណ៍ណែនាំនានា ជាមួយគ្នានេះផងដែរត្រូវធ្វើការកែសម្រួលសមាសភាពអ្នកនាំពាក្យរបស់រដ្ឋបាលខេត្ត ក្នុងន័យដើម្បីធ្វើការឆ្លើយតបនូវមតិយោបល់ផ្សេងៗ ជូនសាធារណជន។ ហើយមួយវិញទៀតត្រូវអនុវត្តឱ្យបានខ្ជាប់ខ្ជួនបំផុតនូវតួនាទី ភារកិច្ច របៀបរបបការងារតាមទីចាត់ការ អង្គភាព ការិយាល័យជំនាញរបស់ខ្លួន និងធ្វើការអភិវឌ្ឍន៍ជំនាញដល់មន្ទីរក្រោមឱវាទ ក្នុងការពង្រឹងសមត្ថភាពបន្ថែមទៀតឱ្យបានតាមការវិវត្តន៍នៃបច្ចេកវិទ្យា។ ជាមួយការបំពេញការងារទាំងអស់ត្រូវធ្វើការផ្សព្វផ្សាយព័ត៌មាន តាមរយៈគេហទំព័រ ហ្វេសប៊ុកផេក និងបណ្ដាញសង្គមផ្សេងៗ ដល់សាធារណជន យើងត្រូវពង្រឹង និងពង្រីកបន្ថែមដល់គ្រប់អង្គភាពទាំងអស់ ទូទាំងខេត្តឱ្យរៀបចំជាព័ត៌មានឱ្យបានកាន់តែរហ័ស ទាន់ពេលវេលា និងគ្រប់ជ្រុងជ្រោយ។
ថ្ងៃពុធ ៦កើត ខែកត្តិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៦ ខែវិច្ឆិកា ឆ្នាំ២០២៤ November 6, 2024