ស្រុកកោះកុង ៖ ថ្ងៃពុធ ៦រោច ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែតុលា ឆ្នាំ២០២៤ លោក ណឹម ភីរម្យ អភិបាលរងស្រុកកោះកុង អញ្ជើញជាអធិបតីបើកវគ្គបណ្តុះបណ្តាល ស្តីអំពីសេចក្តីណែនាំបច្ចេកទេសរៀបចំ និងកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលសម្រាប់រដ្ឋបាលក្រុង ស្រុក នៅសាលប្រជុំ សាលាស្រុកកោះកុង

១- គោលបំណង
ការបង្កើតឡើងនូវវគ្គបណ្តុះបណ្តាលនេះ គឺដើម្បីឱ្យក្រុមប្រឹក្សាអាណត្តិថ្មី និងក្រុមការងារកសាង ផែនការក្រុង ស្រុក និងឃុំ សង្កាត់ បានយល់ដឹងបន្ថែមអំពីនីតិវិធីនៃដំណើរការរៀបចំ និងកសាងផែនការ អភិវឌ្ឍន៍៥ឆ្នាំ និងកម្មវិធីវិនិយោគបីឆ្នាំរកិល សម្រាប់រដ្ឋបាលក្រុង ស្រុក បានទាន់ពេលវេលា និងមាន សង្គតិភាពជាមួយនឹងផែនការយុទ្ធសាស្ត្រខេត្ត។
២- លទ្ធផលរំពឹងទុក
✓ រដ្ឋបាលក្រុង ស្រុក អាចដំណើរការ និងបញ្ចប់ការងារកសាងផែនការអភិវឌ្ឍន៍រយៈពេល៥ឆ្នាំ បានស្របតាមការណែនាំបច្ចេកទេស នីតិវិធី និងទាន់ពេលវេលា
✓ ផែនការអភិវឌ្ឍន៍រយៈពេល៥ឆ្នាំរបស់រដ្ឋបាលក្រុង ស្រុក ត្រូវបានធ្វើការផ្សព្វផ្សាយយ៉ាងទូលំទូលាយ
✓ រដ្ឋបាលក្រុង ស្រុក ប្រមូលតម្រូវការអាទិភាព ក្នុងខែមករា នៃឆ្នាំនីមួយៗ
✓ រដ្ឋបាលឃុំ សង្កាត់ ប្រមូលតម្រូវការអាទិភាព នៅពាក់កណ្តាលខែមករា នៃឆ្នាំនីមួយៗ
✓ បញ្ជូនបញ្ជីគម្រោងវិនិយោគជាអាទិភាពសម្រាប់ប្រើប្រាស់ថវិកា ឃុំ សង្កាត់ របស់ខ្លួន ទៅក្រុមការងារ
✓ រដ្ឋបាលក្រុង ស្រុក បញ្ជូនទៅរដ្ឋបាលខេត្ត នៅដើមខែមីនា នៃឆ្នាំនីមួយៗ

៣- ដំណើរការ
សកម្មភាពសំខាន់ៗ ដែលត្រូវអនុវត្តក្នុងវគ្គបណ្តុះបណ្តាលនេះ រួមមាន៖
✓ បទបង្ហាញអំពីប្រកាសអន្តរក្រសួង លេខ ០១៤៩/ផក ប្រក
✓ បទបង្ហាញអំពីសៀវភៅណែនាំបច្ចេកទេស ស្តីពីការរៀបចំ និងកសាងផែនការអភិវឌ្ឍន៍ក្រុង ស្រុក
និងសៀវភៅណែនាំបច្ចេកទេស ស្តីពីការរៀបចំ និងកសាងកម្មវិធីវិនិយោគបីឆ្នាំរំកិល ក្រុង ស្រុក
✓ បទបង្ហាញចំណុចខ្វះខាត និងបញ្ហាប្រឈម ដែលបានជួបប្រទះមួយរយះពេលកន្លងមក