អាជ្ញាធរខេត្តកោះកុង ចុះពិនិត្យទីតាំងដីស្នើសូមសម្រាប់សាងសង់ទីបញ្ជាការ គណៈបញ្ជាការ នគរបាលជាតិប្រចាំទិសភូមិភាគ៣ នៃអគ្គស្នងការដ្ឋាននគរបាលជាតិ

បណ្ឌិត សំឃិត វៀន អភិបាលរង នៃគណៈអភិបាលខេត្ត តំណាងដ៏ខ្ពង់ខ្ពស់ លោកជំទាវអភិបាលខេត្ត បានដឹកនាំក្រុមការងារ ដែលមានសមាសភាពមកពី មន្ទីរ អង្គភាព ទីចាត់ការជំនាញចំណុះសាលាខេត្ត អាជ្ញាធរមូលដ្ឋានស្រុក ឃុំ និងអ្នកពាក់ព័ន្ធ ចុះទីតាំងដី ចំនួន ០១ទីតាំង ដែលគណៈបញ្ជាការ នគរបាលជាតិប្រចាំទិសភូមិភាគ៣ នៃអគ្គស្នងការដ្ឋាននគរបាលជាតិ ស្នើសូមទីតាំងសម្រាប់សាងសង់ទីបញ្ជាការ អគារសិក្សាជំនាញ និងយុទ្ធសាស្រ្តនគរបាល ស្ថិតនៅភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង។

បន្ទាប់ពីការចុះការពិនិត្យទីតាំងដីជាក់ស្តែង ជាលទ្ធផល លោកអភិបាលរងខេត្ត និងជាប្រធានក្រុមការងារ បានផ្តល់អនុសាសន៍ណែនាំ ឱ្យអាជ្ញាធរស្រុក សហការជាមួយមន្ទីរពាក់ព័ន្ធ ដឹកនាំការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុក និងអាជ្ញាធរឃុំពាក់ព័ន្ធ ចុះពិនិត្យ និងកំណត់និយាមកាឱ្យបានច្បាស់លាស់នូវទីតាំងដីសាធារណៈរបស់រដ្ឋ ដែលបានបម្រុងទុកសម្រាប់ធ្វើការអភិវឌ្ឍជាប្រយោជន៍សាធារណៈ នូវទំហំសមស្របមួយ ដើម្បីផ្តល់ជូនតបតាមសំណើ ដោយបញ្ជៀសនូវការធ្វើឲ្យប៉ះពាល់ដល់ដីកម្មសិទ្ធិស្របច្បាប់របស់ប្រជាពលរដ្ឋ និងឬវិវាទដីធ្លី ដែលនឹងកើតឡើងជាយថាហេតុ៕
ថ្ងៃអង្គារ ១៣ រោច ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៩ ខែមករា ឆ្នាំ២០២៤ January 9, 2024